Իսրայելը և Հունաստանը ստորագրել են մոտ 3 միլիարդ եվրոյի լայնածավալ պաշտպանական համաձայնագիր, որը կոչվում է «Աքիլեսյան վահան»: Համաձայնագիրը նախատեսում է, որ իսրայելական կողմը Աթենքի կարիքների համար կկառուցի հակաօդային պաշտպանության և հակահրթիռային պաշտպանության առաջավոր բազմամակարդակ համակարգ:
Պայմանագրի տակ ստորագրել են Իսրայելի պաշտպանության նախարարության գլխավոր տնօրեն պահեստի գեներալ-մայոր Ամիր Բարամը և նրա հույն գործընկեր Իոանիս Բուրասը:
«Ըստ համաձայնագրի՝ Իսրայելը Հունաստանում կկառուցի համալիր բազմամակարդակ հակաօդային պաշտպանության համակարգ, որն ամբողջությամբ բաղկացած կլինի իսրայելական արտադրության համակարգերից և կօգտագործի պատերազմի ընթացքում Իսրայելի պաշտպանական կառույցների կողմից կուտակված լայնածավալ մարտական փորձը», – նշված է հաղորդագրության մեջ:
Իսրայելի պաշտպանության նախարարությունը նշել է, որ սա իսրայելահունական ռազմական համագործակցության պատմության մեջ խոշորագույն գործարքն է:
«Իսրայելը և Հունաստանը ընդհանուր ռազմավարական շահեր ունեն և բախվում են ընդհանուր տարածաշրջանային մարտահրավերների», – նշել է Իսրայելի պաշտպանության նախարար Իսրայել Կացը:
Աղբյուր՝ www.1in.am
