Հնդկաստանը քաղաքային ենթակառուցվածքների արդիականացման համար մինչև 2031 ֆինանսական տարին կարող է ծախսել մինչև 900 մլրդ դոլար։ Այդ մասին, հղում անելով Bloomberg-ին, հայտնում է աղբյուրը՝ նշելով, որ երկրի ֆինանսական կարգավորիչը փորձում է ակտիվացնել նաև համայնքային պարտատոմսերի շուկան։
Խոսքը վերաբերում է Հնդկաստանի արժեթղթերի և բորսաների խորհրդի՝ SEBI-ի նախաձեռնությանը։ Մայիսին կարգավորիչը հանրային քննարկման էր ներկայացրել փաստաթուղթ, որը նախատեսում է մեխանիզմներ փոքր քաղաքների համար՝ համատեղ ֆինանսավորում ներգրավելու և պարտատոմսերի թողարկման միջոցով միջոցներ հավաքագրելու նպատակով։ Սպասվում է, որ այդ քայլերը կօգնեն մեղմել քաղաքային ենթակառուցվածքների ֆինանսավորման պակասը։
Bloomberg-ի հիշեցմամբ՝ Հնդկաստանը նպատակ ունի մինչև 2047 թվականը դառնալ զարգացած տնտեսություն։ Այդ ռազմավարության շրջանակում իշխանությունները ցանկանում են ընդլայնել համայնքային պարտատոմսերի շուկան, որը դեռևս գտնվում է զարգացման վաղ փուլում։
Գնահատականներով՝ մինչև 2031 ֆինանսական տարին քաղաքային ենթակառուցվածքների արդիականացման համար երկրին անհրաժեշտ կլինի 82 տրլն ռուփիից (855 մլրդ դոլար) մինչև 86 տրլն ռուփի (900 մլրդ դոլար)։ Հատուկ ուշադրություն է դարձվում հիմնական ծառայություններին, այդ թվում՝ խմելու ջրի մատակարարման և կոյուղու համակարգերին։
Ներկայում Հնդկաստանի համայնքային պարտատոմսերի շուկան շարունակում է մնալ փոքր։ Դրա բաժինը երկրում ռուփիով պարտատոմսերի տեղաբաշխումների ընդհանուր ծավալում 1%-ից պակաս է։ Համեմատության համար Bloomberg-ը նշում է, որ ԱՄՆ-ում այս հատվածը կազմում է պարտատոմսերի ամբողջ շուկայի 7%-ը։
Աղբյուր՝ b24.am
