Խորհրդարանական ընտրություններից օրեր անց Պետական եկամուտների կոմիտեի ծառայողները զինված մտել են Հայաստանի երկրորդ նախագահ Ռոբերտ Քոչարյանի ընտանիքին պատկանող ձեռնարկություններ ու ստուգումներ արել:
«Ընտրություններից ընդամենը մեկ շաբաթ հետո գրեթե բոլոր այն ընկերությունները, որոնց մեջ մեր ընտանիքի որևէ անդամ ունի մասնակցություն, զինված հարկայինը, ՊԵԿ-ի չգիտեմ՝ որ ստորաբաժանումն է զենքերով, մտել են ամեն տեղ», - ասաց Ռոբերտ Քոչարյանի որդին՝ Լևոն Քոչարյանը:
Պետական կառույցը հաղորդագրություն չի տարածել: Այսօր լրագրողներին պատմել է «Հայաստան» խմբակցության պատգամավոր, երկրորդ նախագահ Ռոբերտ Քոչարյանի որդին՝ Լևոն Քոչարյանը. Նրա կնոջ՝ երգչուհի Սիրուշոյի արծաթյա զարդերի խանութներն էլ են ստուգել:
«Ոչ մի բան չեն կարող հայտնաբերել, որովհետև իսկապես չկա խախտում», - ասաց նա:
Ի՞նչ էր փնտրում ՊԵԿ-ը Քոչարյանների բիզնեսներում: Լրատվականից մեր հարցին չպատասխանեցին, հորդորեցին գրավոր դիմել:
Քննչական կոմիտեից ասացին, որ վարույթ չկա: Այսինքն ստուգումներից հետո այս պահի դրությամբ քրեական գործ չի հարուցվել:
Ընդդիմադիր «Հայաստան» դաշինքի առաջնորդի ընտանիքին պատկանող բիզնեսները ինչո՞ւ են ստուգել արտակարգ ռեժիմով՝ զինված:
Լևոն Քոչարյանի համոզմամբ՝ ընտրություններին հաջորդած այդ գործողությունները վախեցնելու նպատակով են:
«Այս ամեն ինչը մենք այսպես չենք սրտաճմլիկ ներկայացնում, բայց հսկա ճնշում կա, իհարկե: Այսօր ընդդիմադիր լինելը, առավել ևս ընդդիմադիր պատգամավոր լինելն ինչ-որ արտոնություն չի, հաճույք չի»:
Ընտրություններից հետո Ռոբերտ Քոչարյանի դեմ էլ քրեական վարույթ հարուցվեց՝ պաշտոնական դիրքի չարաշահման և փողերի լվացման հոդվածներով:
Աղբյուր՝ www.azatutyun.am
