Goldman Sachs-ի տվյալներով՝ արհեստական բանականությունն արդեն սկսում է ճնշում գործադրել խոշորագույն զարգացած տնտեսությունների աշխատաշուկաների վրա, ընդ որում ազդեցությունը տարբերվում է՝ կախված ոլորտից և աշխատողների որակավորման մակարդակից:
Ինչպես հաղորդում է CNBC, ամերիկյան ներդրումային բանկն իր ուսումնասիրության ընթացքում պարզել է, որ այն ոլորտներում, որտեղ ԱԲ-ի միջոցով ավտոմատացումն առավել տարածված է, թափուր աշխատատեղերի թվի աճը ընդհանուր առմամբ դանդաղել է 2022 թվականի երկրորդ կեսից:
Հոդվածի համաձայն՝ այդ կապը հատկապես հստակ է դրսևորվում Գերմանիայում, Ավստրալիայում և ԱՄՆ-ում:
Օրերս հրապարակված Goldman Sachs-ի զեկույցում նշվում է, որ 2022 թվականից ի վեր տեղեկատվական և հաղորդակցական ծառայությունների ոլորտում՝ ԱԲ-ի ազդեցությանը առավել ենթակա ոլորտներից մեկում, զբաղվածության աճը դանդաղել է գրեթե բոլոր խոշոր զարգացած տնտեսություններում:
Goldman-ի տվյալներով՝ քոլ-կենտրոններում, կառավարման խորհրդատվության և գովազդի ոլորտներում զբաղվածության մակարդակը զարգացած շուկաներում զգալիորեն նվազել է պատմական միտումից ցածր:
Հատկապես առանձնանում են քոլ-կենտրոնները։ Ներկայում այդ ոլորտում զբաղվածությունը ԱՄՆ-ում միտումային մակարդակից ցածր է 39%-ով, Կանադայում՝ 33%-ով, իսկ Գերմանիայում՝ 27%-ով:
Goldman-ը նշում է, որ այս միտումը ցույց է տալիս՝ ԱԲ-ի ճնշումը զբաղվածության վրա արդեն նկատելի է այն ոլորտներում, որտեղ հասանելի են աշխատանքային գործընթացներն ավտոմատացնելու ունակ գործիքներ:
Եթե աշխատաշուկան դիտարկվի ամբողջությամբ, ապա, հոդվածի համաձայն, մասնագիտությունների՝ ԱԲ-ի ազդեցությանը 10%-անոց ենթարկվածությունը կապված է եղել Ֆրանսիայում, Կանադայում և ԱՄՆ-ում զբաղվածների թվի տարեկան աճի ընդամենը 0.1 տոկոսային կետով նվազման հետ:
Ընդհանուր առմամբ ներդրումային բանկը եզրակացրել է, որ ԱԲ-ի հետ կապված ճնշումը աշխատանքի ընդունման վրա արդեն հստակ արտացոլվում է ամբողջ աշխարհում զբաղվածության տվյալներում, սակայն առայժմ այն սահմանափակվում է համեմատաբար նեղ շրջանակի ոլորտներով և աշխատողների խմբերով:
Աշխատաշուկայի վրա ազդեցությունն ի հայտ է գալիս զարգացած տնտեսություններում ԱԲ-ի տարածման ֆոնին:
Goldman-ը համադրել է տարբեր երկրներում ԱԲ-ի ներդրման մակարդակը չափող 11 ուսումնասիրությունների տվյալները և պարզել, որ խոշորագույն զարգացած տնտեսություններում այդ ցուցանիշը կազմում է մոտ 15–20%:
Ֆրանսիան, ԱՄՆ-ը, Նիդերլանդները և Մեծ Բրիտանիան առաջատար են ԱԲ-ի ներդրման մակարդակով, մինչդեռ Իտալիան, Ճապոնիան և Նոր Զելանդիան հայտնվել են ԱԲ-ի տարածման ամենացածր մակարդակ ունեցող զարգացած տնտեսությունների շարքում:
Աղբյուր՝ b24.am
