Goldman Sachs-ը կարծում է, որ վառելիքի շուկայում այժմ առավել գրավիչ հնարավորություններ կարող են ձևավորվել ոչ թե միայն դիզելի, այլ նաև բենզինի հատվածում։ Ներդրումային բանկը, Bloomberg-ի փոխանցմամբ, իր հիմնական առաջարկությունը դիզելի time spread-երից տեղափոխում է եվրոպական բենզինի վրա՝ հաջորդ տարվա միջին հատվածի համար։
Բանկի վերլուծաբանների գնահատմամբ՝ այս փոփոխության հիմնական պատճառը վերամշակողների վարքագիծն է։ Քանի որ դիզելի շուկան շարունակում է սեղմվել, գործարանները արտադրությունը ավելի շատ ուղղում են դեպի դիզել, ինչի հետևանքով բենզինի շուկան արագորեն խստանում է։
Goldman Sachs-ը ամիսներ շարունակ շեշտում էր, որ նավթային շուկայի ամենամեծ մատակարարման սղությունը կենտրոնացած է հենց դիզելի հատվածում։ Բանկի գնահատմամբ՝ տարվա այս շրջանի համար համաշխարհային վերամշակման ակտիվությունը ամենացածր մակարդակում է 2020 թվականի համավարակից հետո, և հենց դիզելն է գտնվում վառելիքային մատակարարման ճգնաժամի «էպիկենտրոնում»։
Վերլուծաբանները դեռ հուլիսի վերջում գրել էին, որ Մերձավոր Արևելքում և Ռուսաստանում պատերազմի հետևանքով առաջացած վերամշակման գործարանների խափանումները կտրուկ կրճատել են գլոբալ վառելիքային առաջարկը, հատկապես՝ դիզելի։ Միևնույն ժամանակ Ամերիկայում և Աֆրիկայում արտադրության ավելացումը, նրանց հաշվարկով, կարողացել է փոխհատուցել կորցրած առաջարկի միայն մոտ մեկ երրորդը։
Goldman-ի ապրանքային թիմի տվյալներով՝ օգոստոսի վերջի դրությամբ վերամշակման հզորությունների կանգառները սեզոնային միջինից 60% բարձր էին։ Դրա հետևանքով համաշխարհային դիզելի պաշարները մնում են ցածր, իսկ շուկայի սղությունը, բանկի կարծիքով, կշարունակվի նաև հաջորդ տարի։
Ամբողջ ամռան ընթացքում նավթի վերամշակված արտադրանքի համաշխարհային շուկան խստացել է, իսկ վերամշակման մարժաները հասել են ռեկորդային բարձր մակարդակների, քանի որ նավթամթերքների առաջարկը շատ ավելի սահմանափակ է, քան հում նավթի առաջարկը։
Թեև Goldman Sachs-ը շարունակում է ակնկալել դիզելի ֆյուչերսների հետագա աճ, այս շաբաթ բանկի վերլուծաբանները նշել են, որ այժմ բենզինը կարող է առաջարկել «ավելի մեծ գների աճի հնարավորություններ»։ Այդ պատճառով նրանք ներդրողներին խորհուրդ են տալիս երկար դիրքեր բացել եվրոպական բենզինի ֆյուչերսներում՝ 2027 թվականի միջին հատվածի համար։
Աղբյուր՝ oilprice.com
