«Ֆլայուան Հայաստանի» մոլդովացի տերերի գլխին սեւ ամպեր են կուտակվել

Սեւ ամպեր են կուտակվել մոլդովական Fly One ավիաընկերության գլխին, որը հայկական «Ֆլայուան Հայաստան» ավիաընկերության 46 %-ի փայատերն է: Մոլդովական փոխադրողին ստիպում են փոխել իր սեփականատերերին:

Հիշեցնենք, որ «Ֆլայուան Հայաստանը» հիմնադրվել է 2021-ի մարտին, իսկ թռիչքները մեկնակել է նույն տարվա դեկտեմբերից: Փոխադրողի 46 %-ն ի սկզբանե պատկանել է մոլդովական Fly One-ին, իսկ մնացած 54 %-ին տիրապետել են ԱԺ իշխանական նախկին պատգամավոր, գործարար Խաչատուր Սուքիասյանի շրջապատի մարդիկ: Ներկայում նախկին պաշտոնյայի եղբայրներից Էդուարդ Սուքիասյանն է «Ֆլայուան Հայաստանի» 50 %-ի սեփականատերը, իսկ մնացած 4 %-ը պատկանում է ավիաընկերության գլխավոր տնօրեն Արամ Խաչատրյանին:

Նկատենք, որ «Ավիացիայի մասին» օրենքի համաձայն՝ օդանավ շահագործողի վկայական (ՕՇՎ – կոմերցիոն գործունեության իրավունք տվող հիմնարար փաստաթուղթ է քաղաքացիական ավիացիայում) ունեցող ավիաընկերության առնվազն 51 %-ը պետք է պատկանի ՀՀ քաղաքացիների կամ Հայաստանում գրանցված իրավաբանական անձանց:

Ովքե՞ր են Fly One-ի տերերը

Մոլդովական Fly One ավիաընկերությունը հիմնադրվել է 2015-ի սեպտեմբերին եւ մոլդովական քաղավիացիոն իշխանությունների կողմից ՕՇՎ ստացել 2016-ի մարտին: Fly One-ը ունի դուստր ավիաընկերություններ Հայաստանում, Ռումինիայում, Ուզբեկստանում:

Դրա 40 %-ը պատկանում է Մոլդովայի արդարադատության նախկին նախարար Վլադիմիր Չեբոտարի կնոջը, իսկ 10 %-ը՝ նախկին պաշտոնյայի քրոջը:

Վ. Չեբոտարը 2006-2011 թթ. աշխատել է Մոլդովայի ազգային ավիափոխադրող Air Moldova-ում, 2011-2013 թթ. ղեկավարել է Մոլդովայի քաղավիացիայի գերատեսչությունը:

Fly One-ի մնացած 50 %-ը պատկանում է Մոլդովայի քաղավիացիայի գերատեսչության նախկին ղեկավար Միրչա Մալեկայի ընտանիքին:

Ի՞նչ խնդրի առաջ է կանգնել Fly One-ը

Այս տարվա հունիսին հայտնի է դարձել, որ Մոլդովայի պետական անվտանգության համար կարեւորություն ունեցող ներդրումների ուսումնասիրման խորհուրդը (CEIISS) որոշում է կայացրել Fly One-ի վերահսկողության փոփոխություն կատարելու մասին:

Խորհուրդը բազմիցս տեղեկատվություն եւ փաստաթղթեր է պահանջել Fly One-ի եւ «Ֆլայուան Հայաստանի» միջեւ ֆինանսական գործարքների, ներդրումային կառուցվածքի եւ շահառու սեփականատերերի մասին:

Fly One-ը շարունակում է իրականացնել կանոնավոր չվերթեր եւ կատարել իր պարտավորությունները ուղեւորների, գործընկերների եւ այլ տնտեսվարող սուբյեկտների նկատմամբ:

Ի՞նչ կապ ունի օլիգարխ Պլախոտնյուկը

Մոլդովական լրատվամիջոցներն անմիջապես հիշել են օլիգարխ Վլադիմիր Պլախոտնյուկին, որի մերձավոր շրջապատից էր Վլադիմիր Չեբոտարը:

Պլախոտնյուկը ներկայումս գտնվում է ԱՄՆ-ի, ԵՄ-ի, Կանադայի պատժամիջոցների տակ:

Մոլդովայի դատարանը 2026-ի ապրիլին 19 տարվա ազատազրկման դատապարտեց Վ. Պլախոտնյուկին՝ նրան մեղավոր ճանաչելով հանցավոր խմբավորում ղեկավարելու, փողերի լվացման ու խարդախության մեջ:

Աղբյուր՝ hetq.am