Առաջիկայում սպասվող ամբողջական արեգակնային խավարման ընթացքում Եվրոպայում արևային էլեկտրաէներգիայի արտադրությունը կարող է կրճատվել մինչև 9.7 գիգավատտով, ինչը համարժեք է երկու կամ երեք ատոմային էլեկտրակայանների արտադրած հզորությանը:
Եվրահանձնաժողովը նախօրոք զգուշացրել է, որ խավարումը կարող է լրացուցիչ ազդեցություն ունենալ եվրոպական էներգահամակարգի աշխատանքի վրա, և արդեն կազմակերպել է էլեկտրացանցերի օպերատորների տեխնիկական խորհրդակցություն՝ հնարավոր հետևանքները գնահատելու նպատակով:
ENTSO-E-ի տվյալներով՝ պարզ եղանակի դեպքում ֆոտովոլտային կայանների արտադրությունը Եվրոպայում կարող է նվազել մինչև 9.7 ԳՎտ-ով, որը կհանգեցնի էլեկտրաէներգիայի արտադրության կառուցվածքի արագ, սակայն կանխատեսելի փոփոխության:
Եվրոպական էլեկտրացանցերի օպերատորները նախապես պատրաստվել են իրավիճակին: Դիսպետչերները ստացել են համապատասխան հրահանգներ, էներգետիկ շուկայի մասնակիցները նախազգուշացվել են սպասվող արտադրության անկման մասին, իսկ ազգային օպերատորները խավարման ընթացքում կստանան եղանակային ծառայությունների թարմացված կանխատեսումները:
Բացի այդ, խավարման ընթացքում կխուսափեն էլեկտրացանցերի պլանային անջատումներից՝ համակարգի առավելագույն ճկունությունն ապահովելու համար: ENTSO-E-ն նաև ստեղծել է հատուկ աշխատանքային խումբ՝ նախապատրաստական աշխատանքներն ու իրավիճակի մշտադիտարկումը համակարգելու նպատակով:
ENTSO-E-ի տվյալներով՝ 2025 թվականին արևային էներգետիկան ապահովել է Եվրամիությունում արտադրված ամբողջ էլեկտրաէներգիայի շուրջ 13%-ը:
Աղբյուր՝ b24.am
