ԵՐԵՎԱՆ, 26 օգոստոսի. /ԱՌԿԱ/. Եվրոպական կենտրոնական բանկը (ԵԿԲ) պատրաստ է սեպտեմբերի 9-10-ի նիստում կրկին բարձրացնել հիմնական տոկոսադրույքը՝ 2.25%-ից մինչև 2.5%, որպեսզի զսպի Իրանի հետ պատերազմի հետևանքով առաջացած ինֆլացիոն հետևանքները: Այս մասին հաղորդում է Reuters-ը՝ հղում անելով երեք աղբյուրների:
Հունիսին ԵԿԲ-ն առաջին անգամ գրեթե երեք տարվա ընթացքում բարձրացրել է վարկավորման արժեքը՝ ձգտելով կանխել պատերազմի պատճառով էներգիայի գների աճի տարածումը տնտեսության այլ ոլորտներում:
Աղբյուրի տվյալներով, նոր տոկոսադրույքի բարձրացման օգտին են խոսում մոտ 3%-ի մակարդակով ինֆլացիան, շարունակվող հակամարտությունը Իրանում և եվրոզոնի տնտեսության կայունությունը: ԵԿԲ-ի ներկայացուցիչները գների աճի հիմնական գործոններ են համարում բնական գազի և բենզինի բարձր գները:
Այդուհանդերձ, կարգավորիչը դեռևս չի մտադիր ազդանշան տալ ավելի խիստ դրամավարկային քաղաքականության մասին: Երկարաժամկետ ինֆլացիոն սպասումները մնում են ԵԿԲ-ի 2% նպատակային ցուցանիշի շուրջ, սակայն ֆինանսական շուկաները սպասում են ևս մեկ կամ երկու տոկոսադրույքի բարձրացում:
Կարգավորիչի վերջնական դիրքորոշումը կախված կլինի օգոստոսի ինֆլացիայի տվյալներից և ԵԿԲ-ի նորացված տնտեսական կանխատեսումներից, որոնք կներկայացվեն սեպտեմբերի նիստում:
Աղբյուր՝ armbanks.am
