Evocabank-ը Moody’s Ratings-ի կողմից ստացել է Ba3 երկարաժամկետ տեղական արժույթով եւ արտարժույթով ավանդների ու թողարկողի վարկանիշներ, որոնք գտնվում են Հայաստանի Հանրապետության (Ba3 positive) սուվերեն վարկանիշի նույն մակարդակում։ Moody’s-ի գնահատմամբ՝ Evocabank-ի Ba3 վարկունակության բազային գնահատականը (Baseline Credit Assessment, BCA) արտացոլում է բանկի կապիտալի ամուր բուֆերը, կայուն շահութաբերությունը եւ ֆինանսավորման դիվերսիֆիկացված բազան։
Moody’s-ը նաեւ ընդգծում է Evocabank-ի վարկային պորտֆելի դիվերսիֆիկացված կառուցվածքը՝ կորպորատիվ, փոքր եւ միջին ձեռնարկությունների (ՓՄՁ) եւ մանրածախ վարկավորման հատվածներում, ինչպես նաեւ Բանկի կենտրոնացումը գրավով ապահովված վարկավորման վրա։ Բանկի ֆինանսավորման բազան եւս գնահատվել է որպես դիվերսիֆիկացված՝ պայմանավորված ձեւավորված հաճախորդային բազայով եւ միջազգային ֆինանսական հաստատությունների հետ երկարամյա համագործակցությամբ։
«Moody’s-ի կողմից շնորհված վարկանիշները կարեւոր ձեռքբերում են Evocabank-ի համար՝ ամրապնդելով Բանկի ճանաչելիությունը եւ նպաստելով միջազգային ֆինանսական հաստատությունների ու ներդրողների հետ հարաբերությունների հետագա զարգացմանը»,- ասված է հաղորդագրության մեջ։
Աղբյուր՝ banks.am
