«Ծովինար» ապրանքանիշի գազավորված ըմպելիքների երեք տեսակի արտադրությունը կասեցվել է սննդամթերքի անվտանգության տեսչական մարմնի կողմից: Կասեցումը տեղի է ունեցել Գեղարքունիքի մարզի Մարտունի համայնքի Ծովինար բնակավայրում, անհատ ձեռնարկատեր Աիդա Քոչարյանին պատկանող արտադրամասում:
Վերահսկողության ընթացքում վերցվել են արտադրատեսակներից նմուշներ լաբորատոր փորձաքննության նպատակով: Փորձաքննության արդյունքներով պարզվել է, որ որոշ նմուշներ չեն համապատասխանում օրենսդրությամբ սահմանված պահանջներին:
- «Գազավորված ըմպելիք բարբարիսի համով» արտադրատեսակի նմուշում արձանագրվել են խախտումներ «մեզոֆիլ աէրոբ մանրէների քանակ» (ՄԱՄՔ) և «խմորասունկ/բորբոսասունկ (գումարային)» ցուցանիշներում:
- «Գազավորված ըմպելիք տանձի համով» և «Գազավորված ըմպելիք թարխունի համով» արտադրատեսակների նմուշները նույնպես չեն համապատասխանում ՄԱՄՔ ցուցանիշի պահանջներին:
Սննդամթերքի անվտանգության տեսչական մարմնի ղեկավարի որոշմամբ, արտադրամասի արտադրական գործունեության առանձին գործառույթը՝ նշված երեք արտադրատեսակների արտադրությունը, կասեցվել է:
Հայտնաբերված խախտումները վերացնելու համար սահմանվել է համապատասխան ժամկետ:
Աղբյուր՝ www.1in.am
