Չինական արհեստական բանականության մշակողները արագորեն կրճատում են ամերիկյան մրցակիցներից իրենց հետ մնալը և արդեն առաջատար դիրքեր են զբաղեցնում բաց կոդով մոդելների ոլորտում: Այս մասին հաղորդում է CNBC-ն:
Hugging Face ստարտափի գլխավոր տնօրեն Կլեման Դելանգը հայտարարել է, որ Չինաստանը կարող է արհեստական բանականության առաջատար տեխնոլոգիաների ոլորտում առաջատար դիրքեր զբաղեցնել արդեն այս կամ հաջորդ տարվա վերջում:
«Այս պահին Չինաստանը բաց մոդելների ոլորտում ակնհայտորեն գերիշխում է», – նշել է ընկերության ղեկավարը:
Չնայած ԱՄՆ-ի կողմից սահմանված արտահանման սահմանափակումներին, որոնք դժվարացնում են առաջատար չիպերի հասանելիությունը, չինական համակարգերը, այդ թվում՝ Moonshot ընկերության Kimi K3 մոդելը, արդեն շատ մոտ են շուկայի առաջատարների՝ Anthropic-ի և OpenAI-ի ցուցանիշներին:
Փորձագետների կարծիքով՝ չինական լուծումներն աստիճանաբար դառնում են զարգացող երկրների համար նախընտրելի ընտրություն՝ բարձր արդյունավետության և ավելի ցածր արժեքի շնորհիվ:
Միևնույն ժամանակ, Միացյալ Նահանգները շարունակում է պահպանել առավելությունը հզոր հաշվարկային ենթակառուցվածքների, մասնավոր ներդրումների ռեկորդային ծավալների և աշխարհի տարբեր երկրներից բարձրակարգ մասնագետներ ներգրավելու հնարավորության շնորհիվ:
Սակայն չինական ընկերություններն ակտիվորեն որոնում են սահմանափակումները շրջանցելու ուղիներ՝ զարգացնելով կիսահաղորդիչների ներքին արտադրությունը և ներդնելով նորարարական լուծումներ:
Այս պայմաններում, մասնագետների գնահատմամբ, արհեստական բանականության ոլորտում համաշխարհային տեխնոլոգիական մրցավազքի վերջնական արդյունքը շարունակում է մնալ անորոշ:
Տեխնոլոգիական հրապարակումներն իրականացվում են Իդրամի աջակցությամբ:
Աղբյուր՝ b24.am
