Չինաստանում մինչև 2030 թվականը նավթի և գազի արդյունահանման ծավալը պետք է հասնի 440 մլն տոննա նավթային համարժեքի՝ համաձայն զարգացման նոր հնգամյա ծրագրի, որը ներկայացրել են Ազգային էներգետիկ վարչությունը (NEA) և Զարգացման և բարեփոխումների պետական կոմիտեն (NDRC):
Ծրագրով նաև նախատեսվում է մինչև 2030 թվականը կառուցել 20 հազար կմ մայրուղային նավթամուղներ և գազատարներ։ Արդյունքում երկրի խողովակաշարային ցանցի ընդհանուր երկարությունը կհասնի 220 հազար կմ-ի:
«Նավթն ու գազը էներգիայի և արդյունաբերական հումքի առանցքային աղբյուրներ են, իսկ դրանց մատակարարումներն անմիջականորեն կապված են Չինաստանի էներգետիկ անվտանգության և բնակչության բարեկեցության հետ»,- նշվում է NEA-ի փաստաթղթում:
Ծրագրի նպատակն է ձևավորել ժամանակակից նավթագազային արդյունաբերություն՝ ներքին մատակարարման ավելի հզոր կարողություններով, ավելի արդյունավետ խողովակաշարային ցանցերով, ավելի էկոլոգիապես մաքուր արտադրությամբ, ավելի անվտանգ և արդյունավետ շահագործմամբ, ավելի բարձր եկամտաբերությամբ վերամշակմամբ և ավելի բազմազան միջազգային համագործակցությամբ:
Հիմնական խնդիրների թվում են նավթի և գազի հետախուզման ու արդյունահանման ծավալների ավելացումը, ենթակառուցվածքների ընդլայնումը, ածխաջրածինների պաշարների մեծացումը, միջազգային համագործակցության խորացումը, «կանաչ» անցման արագացումը և նոր, բարձրորակ արտադրողական ուժերի զարգացումը, տեխնոլոգիական նորարարությունների խթանումը և նավթագազային ոլորտում բարեփոխումների խորացումը:
2025 թվականին Չինաստանում նավթի և գազի համախառն արդյունահանումը հասել է ռեկորդային՝ 420 մլն տոննա նավթային համարժեքի:
Աղբյուր՝ b24.am
