Բրազիլիայի սուրճի արտահանողների խորհրդի նախագահ Մարսիու Ֆերեյրան հայտնել է, որ հաջորդ տարի երկրում սուրճի բերքը կարող է նվազել։ Դրա պատճառը կարող է լինել Էլ Նինյո կլիմայական երևույթը, եթե առաջիկա աշնանն այն տեղումների պակասի պատճառ դառնա։
Օդերևութաբանները Էլ Նինյոյի սկիզբը գրանցել են հունիսին, և ներկայում այդ երևույթը շարունակում է ուժգնանալ։ Ամերիկացի գիտնականների գնահատմամբ՝ հավանականությունը, որ մինչև տարեվերջ այն կդառնա շատ հզոր, կազմում է 95%։ Բրազիլիայի հարավարևելյան շրջանում, որը արաբիկա սուրճի աճեցման հիմնական գոտին է, կանխատեսվում է երկարատև երաշտ։
«Էլ Նինյոյի ազդեցությունը բերքի վրա, հավանաբար, ավելի նկատելի կդառնա սեպտեմբերից և, հնարավոր է, հատկապես հոկտեմբերին։ Կարևոր է հետևել երևույթի զարգացմանը ծաղկման շրջանում, քանի որ դրանից հետո անհրաժեշտ են կանոնավոր տեղումներ։ Եթե տեղումների քանակը զգալիորեն նվազի, բրազիլական բերքը կարող է տուժել», – հայտարարել է Ֆերեյրան։
Ինչպես նշել է խորհրդի ղեկավարը, բերքի հեռանկարները հնարավոր կլինի գնահատել միայն ծաղկման ավարտից, պտղակալման սկզբնական փուլից և պտուղների հետագա աճից հետո։ Այս փուլերից յուրաքանչյուրում վճռորոշ դեր են ունենալու եղանակային պայմանները։
«Պլանտացիաների ներկայիս վիճակը թույլ է տալիս հույս ունենալ հաջորդ տարի գերազանց բերքի վրա, թեև պարտադիր չէ, որ այն նույնքան մեծ լինի, որքան այս տարվա բերքը։ Սակայն ամեն ինչ կախված կլինի հետագա եղանակային պայմաններից», – ընդգծել է խորհրդի նախագահը։
Էլ Նինյոն բնական կլիմայական երևույթ է, որի ժամանակ Խաղաղ օվկիանոսի հասարակածային հատվածում ջրի մակերևութային շերտի ջերմաստիճանը բարձրանում է անոմալ բարձր մակարդակի։ Այս գործընթացի հետևանքով կարող են փոխվել օդի ջերմաստիճանային ռեժիմը և տեղումների բնույթը։
Բրազիլիան Էլ Նինյոյի ազդեցությանը ենթակա տարածաշրջաններից է․ երկրի հյուսիսում և Ամազոնիայում գրանցվում են ուժեղ երաշտ և ծայրահեղ շոգ, մինչդեռ հարավային շրջաններում դիտվում են հորդառատ անձրևներ և ջրհեղեղներ։
Աղբյուր՝ b24.am
