Արժույթի միջազգային հիմնադրամի (ԱՄՀ) գործադիր տնօրենի առաջին տեղակալն ուշադրություն է հրավիրել ԱՄՆ դոլարին կապակցված ստեյբլքոյնների աճող տարածման հետ կապված ռիսկերի վրա։ Նրա խոսքով՝ այդ միտումը կարող է սահմանափակել դրամավարկային քաղաքականության ճկունությունը և մեծացնել ֆինանսական կայունության համար առկա վտանգները։
«Դոլարայնացումը կարող է ունենալ երկարաժամկետ մակրոտնտեսական հետևանքներ։ Երբ այն արմատավորվում է, սովորաբար դառնում է չափազանց կայուն երևույթ, նույնիսկ այն բանից հետո, երբ այն առաջացրած պայմաններն այլևս գոյություն չունեն»։
ԱՄՀ-ի ղեկավարության ներկայացուցիչը նշել է, որ ԱՄՆ դոլարով ապահովված ստեյբլքոյնները էականորեն տարբերվում են դոլարայնացման նախկին ձևերից։ Դրանց գլխավոր առանձնահատկությունն այն է, որ կարող են շատ արագ տարածվել սմարթֆոնների և թվային հարթակների միջոցով։
ԱՄՀ պաշտոնյայի խոսքով՝ նման թվային ակտիվների լայն տարածումը կարող է ուժեղացնել կապիտալի հոսքերի տատանողականությունը, մակրոտնտեսական ճնշումների ժամանակ լրացուցիչ ազդեցություն ունենալ փոխարժեքների վրա և մի շարք երկրներում առաջացնել ֆինանսական անկայունություն։
Նա նաև ընդգծել է, որ այն երկրներում, որտեղ դոլարի հասանելիությունը սահմանափակ է, իսկ մակրոտնտեսական հիմքերը՝ թույլ, ստեյբլքոյնների լայն կիրառումը կարող է հանգեցնել արտարժույթով ակտիվների ծավալի զուտ աճի և տնտեսության դոլարայնացման մակարդակի բարձրացման։
Աղբյուր՝ b24.am
