Սպիտակ տունը քննարկում է պետական ինկուբատոր ստեղծելու հնարավորությունը, որը կկենտրոնանա կիբերանվտանգության ոլորտի հետազոտությունների և այն ստարտափների զարգացման վրա, որոնք գործիքներ կմշակեն կառավարության կարիքների համար։ Այդ մասին, իրազեկ աղբյուրներին հղումով, հայտնել է Bloomberg-ը։
Աղբյուրների տվյալներով՝ Սպիտակ տան ազգային կիբերտնօրենի գրասենյակը պատրաստում է համապատասխան գործադիր հրամանի նախագիծ։ Առաջարկվող ծրագրի նպատակն է մշակել և փորձարկել կիբերտեխնոլոգիաներ, որոնք կհամապատասխանեն ԱՄՆ կառավարության առաջնահերթություններին, ինչպես նաև ներգրավել մասնավոր վենչուրային ներդրումներ։
Նախագծի տարբերակներից մեկում նախաձեռնությունը բնորոշվում է որպես «կիբերդարբնոց», որի առաքելությունը նոր ընկերությունների ձևավորումն է։ Ծրագրին ծանոթ աղբյուրները նշում են, որ վարչակազմի ներսում այն համեմատում են Իսրայելի մոդելի հետ, որտեղ ռազմական առաջնահերթությունները սերտ կապ ունեն կիբերանվտանգության ստարտափների, վենչուրային կապիտալի և ակադեմիական հետազոտությունների հետ։
Bloomberg-ի աղբյուրների գնահատմամբ՝ ԱՄՆ-ում արդեն գործում են տեխնոլոգիական հետազոտություններին աջակցող մի շարք կառույցներ։ ԱՄՆ պաշտպանության նախարարության Առաջադեմ հետազոտական նախագծերի գործակալությունը (DARPA) տասնամյակներ շարունակ ֆինանսավորում է տեխնոլոգիական մշակումները, իսկ Կենտրոնական հետախուզական վարչությունը (CIA) աջակցում է In-Q-Tel ոչ առևտրային վենչուրային հիմնադրամին։ Սակայն մինչ այժմ ԱՄՆ-ում չի ձևավորվել կառույց, որը բացառապես նվիրված լինի կիբերանվտանգությանը։
Հրամանի նախագիծը մշակվում է այն փուլում, երբ վարչակազմը փորձում է հակազդել արհեստական բանականության հետ կապված կիբերսպառնալիքներին։ ԱԲ-ն, ըստ հրապարակման, կարող է արագացնել կիբերհարձակումները և որոշ դեպքերում համակարգել երրորդ կողմերի համակարգերի աննկատ կոտրումները։
Նախաձեռնությունը նաև ներառում է կիբերանվտանգության ակադեմիա ստեղծելու դրույթ, որը պետք է միավորի այս ոլորտում մասնագետների պատրաստման գործող պետական ծրագրերը։
Փաստաթղթի ստորագրման ժամկետները դեռ հայտնի չեն։ Անհայտ է նաև, թե արդյոք նախագահ Դոնալդ Թրամփը հաստատել է նախագիծը կամ մտադիր է այն ստորագրել։ Միևնույն ժամանակ աղբյուրները նշել են, որ փաստաթուղթն արդեն փոխանցվել է մի շարք գերատեսչությունների համապատասխան աշխատակիցներին։
Աղբյուր՝ b24.am
