Իլոն Մասկի SpaceXAI-ը ներկայացրել է արհեստական բանականության Grok 4.7 մոդելը, որը նախատեսված է նախևառաջ ծրագրային կոդի գրման և գիտական խնդիրների լուծման համար։ Ընկերության ներկայացմամբ՝ Grok 4.6-ի համեմատ նոր տարբերակի աշխատանքի արագությունն ու օգտագործման արժեքը չեն փոխվել։
SpaceXAI-ի տվյալներով՝ CursorBench 4.0 թեստում Grok 4.7-ը գնի և արտադրողականության հարաբերակցությամբ ցուցադրել է առաջատար արդյունք։ Ընկերությունը նշում է, որ մոդելը անցել է ամրապնդմամբ ուսուցման ավելի երկար փուլ և մշակվել է նաև ավելի բարդ, այդ թվում՝ մի քանի ժամ տևող առաջադրանքների համար։
Մշակողի խոսքով՝ Grok 4.7-ը ավելի լավ է ստուգում սեփական աշխատանքի արդյունքները, արդյունավետ աշխատում է երկար համատեքստի հետ և ավելի վստահ է կատարում երկխոսային ձևաչափով առաջադրանքները։ Բացի այդ, այն ստեղծում է ավելի որակյալ գրասենյակային փաստաթղթեր և շնորհանդեսներ։
GDPval և AA Briefcase մասնագիտական թեստերում մոդելը, ըստ SpaceXAI-ի, գերազանցել է նախորդ տարբերակին և ցույց տվել արդյունքներ, որոնք համադրելի են ոլորտի առաջատար համակարգերի ցուցանիշներին։
Առանձին ուշադրություն է դարձվել անվտանգությանը։ Ընկերության տվյալներով՝ թարմացված գործիքների շնորհիվ Grok 4.7-ը ավելի արդյունավետ է մերժում վնասակար հարցումները և ավելի լավ է դիմակայում համակարգը կոտրելու փորձերին։ LatchBio կենսատեխնոլոգիական անվտանգության թեստում այն զբաղեցրել է առաջին տեղը՝ 62,4% արդյունքով, իսկ HackerBench v0.3-ում երկակի նշանակության ռիսկային հարցումների ընդամենը 3,3%-ն է անցել՝ միաժամանակ հազվադեպ արգելափակելով պաշտպանական նպատակներով օրինական հարցումները։
Grok 4.7-ն արդեն հասանելի է Cursor-ում, Grok Build-ում, Grok API-ի միջոցով, ինչպես նաև կոդի գեներացման այլ ծառայություններում և ամպային հարթակներում։ Գնային առաջարկը սկսվում է 1 մլն մուտքային տոկենի դիմաց 2 դոլարից և 1 մլն ելքային տոկենի դիմաց 6 դոլարից։ Առկա է նաև տարբերակ՝ կրկնակի արագությամբ և կրկնակի գնով։
Աղբյուր՝ b24.am
