Սաուդյան Արաբիայի հում նավթի արտահանումը սեպտեմբերին կտրուկ աճել է՝ հասնելով օրական 6 մլն բարելի։ Kpler-ի տվյալներով՝ սա ամենաբարձր մակարդակն է այն պահից ի վեր, երբ մոտ յոթ ամիս առաջ սկսվեց Իրանի պատերազմը, և այն համապատասխանում է թագավորության 2025 թվականի ամսական միջին ցուցանիշին։
Արտահանման աճը գրանցվել է նույնիսկ այն բանից հետո, երբ այս ամիս փակվել էր երկրի համար առանցքային East-West նավթամուղը։ Խողովակաշարը վնասվել էր Իրաքից իրականացված անօդաչու թռչող սարքի հարվածից։ Սեպտեմբերի մատակարարումները գրեթե 80%-ով գերազանցել են օգոստոսի 3.4 մլն բարել օրական ցուցանիշը։
Իրանի պատերազմի ընթացքում East-West նավթամուղը կարևոր դեր էր խաղում համաշխարհային նավթի շուկայի համար, քանի որ Սաուդյան Արաբիային հնարավորություն էր տալիս շրջանցել Հորմուզի նեղուցը։ Այդ ուղին հատկապես կարևոր էր այն պայմաններում, երբ Իրանը հարձակումներ էր իրականացնում նեղուցով անցնող տանկերների վրա։ Այդ պատճառով Ռիադը երկրի արևելյան նավթարդյունահանող շրջաններից արտահանումը տեղափոխել էր Կարմիր ծովի Յանբու տերմինալ։
Խողովակաշարի կանգից հետո Brent տեսակի նավթի գինը մեկ բարելի համար հասել էր գրեթե 110 դոլարի, սակայն հետագայում նվազել է, քանի որ շուկաներում աճել է վստահությունը, որ խափանումը սկզբնական մտավախություններից պակաս ազդեցիկ է լինելու։
Այժմ Սաուդյան Արաբիան արտահանման մի մասը վերաուղղել է կրկին Հորմուզի նեղուցով։ Դա հնարավոր է դարձել այն բանից հետո, երբ ԱՄՆ զինված ուժերը Օմանի ափերի երկայնքով նավարկության միջանցք են ձևավորել։ Այդ նույն երթուղուց ամիսներ շարունակ օգտվում են նաև մյուս Պարսից ծոցի երկրները, թեև Իրանի շարունակվող հարձակումների պատճառով այն շարունակում է վտանգավոր մնալ։
Kpler-ի ապրանքահումքային հետազոտությունների տնօրեն Matt Smith-ի խոսքով՝ Մերձավոր Արևելքի ծոցից արտահանման աճը East-West նավթամուղի խափանման հետևանք է, բայց միաժամանակ կարող է վկայել նաև Հորմուզի նեղուցից օգտվելու ավելի մեծ վստահության մասին՝ աճող երթևեկության ֆոնին։
Kpler-ի տվյալներով՝ չորեքշաբթի օրը Հորմուզով նավթի արտահանումը յոթօրյա միջին հաշվով կազմել է օրական 13.2 մլն բարել՝ մինչդեռ մինչև Իրանի պատերազմը, երբ երթևեկությունը դեռ չէր խաթարվել, այն մոտ 17 մլն բարել էր օրական։
Reuters-ին ոլորտային աղբյուրները հայտնել են, որ East-West նավթամուղը շաբաթվա սկզբին վերագործարկվել է փոքր ծավալներով և այժմ աստիճանաբար մեծացնում է հոսքերը։ Սաուդյան Արաբիան դեռ հրապարակայնորեն չի հաստատել, որ խողովակաշարը կրկին աշխատում է։
Միևնույն ժամանակ, Saudi Aramco-ի գործադիր տնօրեն Amin Nasser-ը ճապոնական Nikkei-ին ասել է, որ նավթային ենթակառուցվածքներում «ժամանակավոր ընդհատումները» սովորաբար տևում են «օրեր, ոչ թե շաբաթներ կամ ամիսներ»։ Նա, սակայն, հրաժարվել է East-West նավթամուղի վերաբերյալ ավելի կոնկրետ տեղեկություն տրամադրել։
Աղբյուր՝ www.cnbc.com
