Ուորեն Բաֆեթը կատարել է Berkshire Hathaway-ից աստիճանաբար հեռանալու իր բազմամյա ծրագրի հերթական խոշոր քայլը՝ հրաժարվելով ընկերության խորհրդի նախագահի պաշտոնից։ Ընկերության հայտարարության համաձայն՝ նա կմնա տնօրենների խորհրդում որպես chairman emeritus և կշարունակի, ինչպես նշվում է, տրամադրել իր «արժևորելի դատողությունն ու տեսակետը»։
Բաֆեթի իրավահաջորդության երկարաժամկետ պլանի համաձայն՝ Berkshire Hathaway-ի խորհրդի նախագահ կդառնա նրա որդին՝ Հովարդ Բաֆեթը։ Բաժնետերերին ուղղված նամակում Ուորեն Բաֆեթը նշել է, որ Հովարդի հիմնական պարտականությունը լինելու է «պահպանել Berkshire-ի մշակույթն ու արժեքները, որոնք մեր հաշվեկշռում եղած ցանկացած բանից ավելի արժեքավոր են»։
Սա Բաֆեթի հեռացման ծրագրի արդեն երրորդ մեծ քայլն է։ Նախորդ տարիներին նա ավելի ու ավելի մեծ գործառնական պատասխանատվություն էր փոխանցում Berkshire-ի երկարամյա ղեկավար Գրեգ Աբելին։ Այնուհետև 2025-ի մայիսին Բաֆեթը հայտարարեց, որ 2025 թվականի վերջում կլքի գլխավոր տնօրենի պաշտոնը, բայց կմնա խորհրդի նախագահ, իսկ գլխավոր տնօրեն կդառնա Աբելը։ Այժմ նա հրաժարվում է նաև նախագահի պաշտոնից, թեև ամբողջությամբ չի հեռանում ընկերությունից։
Ընկերության հաղորդագրությունն ու Բաֆեթի նամակը շեշտում են կառավարման շարունակականությունը։ Գրեգ Աբելը նշել է, որ Բաֆեթի ստեղծած մշակույթն ու նրա պաշտպանած արժեքները կմնան Berkshire-ի հիմքում, իսկ Հովարդ Բաֆեթը կլինի դրանց պահապանը։ Ուորեն Բաֆեթը նաև հիշեցրել է, որ իր որդին 33 տարի եղել է տնօրենների խորհրդի անդամ՝ հավելելով, որ բաժնետերերը պետք է նրան ընկալեն որպես մի տեսակ պաշտպանական երաշխիք, որից հույս ունեն երբեք չօգտվել։
Շուկան այս հայտարարությանը սկզբում զգուշավոր արձագանք տվեց, սակայն օրվա վերջում Berkshire-ի թե՛ Class A, թե՛ Class B բաժնետոմսերը գրեթե անփոփոխ փակվեցին։ CNBC-ի նյութում նշվում է, որ ներդրողները, ըստ երևույթին, այս փոփոխությունը չեն դիտարկում որպես ընկերության հեռանկարների կտրուկ վատթարացման ազդակ, առնվազն այս փուլում։
Միաժամանակ Berkshire-ի բաժնետոմսերի արդյունքները վերջին շրջանում հետ են մնում լայն շուկայից։ Անցյալ տարվա մայիսից, երբ Բաֆեթը հայտարարեց, որ 2025-ի վերջում կլքի գլխավոր տնօրենի պաշտոնը, Berkshire-ի բաժնետոմսերը նվազել են ավելի քան 5%-ով, մինչդեռ S&P 500-ը նույն ընթացքում աճել է ավելի քան 34%-ով։ Այս տարվա սկզբից Berkshire-ի B դասի բաժնետոմսերն էլ հենանիշից հետ են մնում ավելի քան 10 տոկոսային կետով։
Հոդվածում առանձին անդրադարձ կա նաև Հովարդ Բաֆեթի կենսագրությանը։ Նա լայն հանրությանը շատ ավելի քիչ է հայտնի, քան իր հայրը, սակայն նոր մարդ չէ կորպորատիվ կառավարման ոլորտում։ Հովարդ Բաֆեթը ղեկավարում է ֆերմաներ Նեբրասկայում և Իլինոյսում, զբաղվել է իրավապահ գործունեությամբ և նախկինում եղել է Coca-Cola, Coca-Cola Enterprises և ConAgra Foods ընկերությունների խորհրդի անդամ։
Նա նաև խոշոր բարեգործ է։ Նրա հիմնադրամը, որը ամեն տարի նվիրատվություն է ստանում Ուորեն Բաֆեթից, անցյալ տարի բաշխել է $700 միլիոն՝ կենտրոնանալով սննդային անվտանգության, հակամարտությունների մեղմման և մարդկանց թրաֆիքինգի դեմ պայքարի վրա։ Հաղորդվում է, որ Ուկրաինան եղել է ծրագրերի գլխավոր շահառուներից մեկը՝ 2025 թվականին ստանալով մոտ $350 միլիոն, իսկ 2022 թվականին Ռուսաստանի ներխուժումից ի վեր՝ ընդհանուր $1.1 միլիարդ։
Թեև Հովարդ Բաֆեթը դասական գործարարի կերպար չունի, The Wall Street Journal-ը նշում է, որ նա ծանոթ է կորպորատիվ խորհուրդների աշխատանքին։ Միևնույն ժամանակ պարբերականը գրում է, որ Berkshire Hathaway-ի նախագահի պաշտոնում նրա գլխավոր առավելությունն այն է, որ նա Ուորեն Բաֆեթի որդին է։ Ինքը՝ Բաֆեթը, 2025 թվականին ասել էր. «Նա ստանում է այս պաշտոնը, որովհետև իմ որդին է»։ Հովարդ Բաֆեթն էլ նշել էր, որ իրեն պատրաստ է զգում այդ դերին, քանի որ երկար տարիներ այդ ուղղությամբ պատրաստվել է հոր ազդեցության և ուսուցման ներքո։
Բաֆեթը վերջին նամակում նաև գրել է, որ դեռ ունի «աշխարհի լավագույն աշխատանքը» և իրեն երբեք այսքան լավ չի զգացել այն ամենի վերաբերյալ, ինչ սպասվում է հետո։ Սակայն ուրբաթ օրվա հայտարարությունը ցույց է տալիս, որ Berkshire Hathaway-ում իրավահաջորդության պլանը մտնում է իր ամենակարևոր փուլերից մեկը։
Աղբյուր՝ www.cnbc.com
