Նիկոլ Փաշինյանը Ֆրանկֆուրտում հանդիպել է գործարարների հետ

Վարչապետ Նիկոլ Փաշինյանը Ֆրանկֆուրտի արդյունաբերության և առևտրի պալատում հանդիպում է ունեցել տեղի գործարարների մի խմբի հետ, որոնք ներկայացնում են տնտեսության տարբեր ոլորտներ։ Այդ մասին հայտնել է Կառավարության մամուլի ծառայությունը։

Հանդիպման ընթացքում վարչապետը խոսել է Հայաստանի և Ադրբեջանի միջև հաստատված խաղաղության, դրա հետևանքով տարածաշրջանում ձևավորվող նոր զարգացումների և առաջացող հնարավորությունների մասին։ Նրա խոսքով՝ օրակարգում է նաև տարածաշրջանային հաղորդակցության ուղիների ապաշրջափակմանը միտված TRIPP նախագծի իրականացումը, և այդ ուղղությամբ ամենօրյա աշխատանք է կատարվում։

Նիկոլ Փաշինյանը անդրադարձել է նաև Հայաստան-Եվրոպա հարաբերությունների խորացմանը, առևտրատնտեսական համագործակցությանը և Հայաստանից արտահանման դիվերսիֆիկացման ուղղությամբ իրականացվող քայլերին։ Նա կարևորել է այս գործընթացներում ԵՄ-ի շարունակական աջակցությունը։

Վարչապետը ներկայացրել է Հայաստանում տնտեսության տարբեր ճյուղերում գրանցվող զարգացումները, առկա ներդրումային և գործարար հնարավորությունները, ինչպես նաև բիզնես միջավայրի հետևողական բարելավման նպատակով Կառավարության իրականացրած բարեփոխումներն ու ծրագրերը։

Հանդիպման ավարտին Նիկոլ Փաշինյանը պատասխանել է գործարարների հարցերին։

Աղբյուր՝ hetq.am