Meta Platforms-ի անձնական արհեստական բանականության գործակալ Muse-ը արագորեն մեծացնում է իր օգտատերերի բազան և, վերլուծաբանների գնահատմամբ, կրկին սպառողին դարձնում է Wall Street-ի AI թեմայի գլխավոր շարժիչներից մեկը։ Շուկայի մասնակիցների ուշադրությունը, որը վերջին շրջանում հիմնականում կենտրոնացած էր բիզնես և կորպորատիվ AI լուծումների վրա, այժմ ավելի շատ տեղափոխվում է սպառողական կիրառությունների ուղղությամբ։
Jefferies-ի և Sensor Tower-ի տվյալներով՝ Muse-ը գործարկումից հետո առաջին երկու շաբաթում գրանցել է ավելի քան 2.5 միլիոն ներբեռնում ամբողջ աշխարհում։ Այդ ցուցանիշը նույն ժամանակահատվածում գերազանցել է Anthropic-ի Claude-ի և Google-ի Gemini-ի արդյունքները։ UBS-ը, հղում անելով Apptopia-ի տվյալներին, նաև նշել է, որ iOS ներբեռնումների մասով Muse-ը գերազանցում է նույնիսկ OpenAI-ի սկզբնական ChatGPT չաթբոտին։
JPMorgan-ի Doug Anmuth-ը հաճախորդներին ուղղված իր գրառման մեջ նշել է, որ Muse-ը կարող է դառնալ ոլորտի առաջատար սպառողական AI հավելվածը։ Նրա խոսքով՝ այն ունի ներուժ՝ ChatGPT-ից հետո դառնալու ամենալայն օգտագործվող սպառողական AI հավելվածը։ Միևնույն ժամանակ Jefferies-ը բարձրացրել է Meta-ի բաժնետոմսերի թիրախային գինը՝ $710-ից հասցնելով $875-ի, ինչը ենթադրում է 18% աճի հնարավորություն երկուշաբթի օրվա փակման համեմատ։
AI շուկայի համար հետևանքները
Evercore ISI-ի ինտերնետային հետազոտությունների ղեկավար Mark Mahaney-ը CNBC-ին ասել է, որ սպառողական AI տարածքը երկար ժամանակ մնացել էր ստվերում, քանի որ շուկան հիմնականում հետապնդում էր enterprise AI թեման։ UBS-ի վերլուծաբան Ulrike Hoffmann-Burchardi-ն ավելի հեռուն է գնացել՝ նշելով, որ սպառողական գործակալները կարող են դառնալ AI trade-ի հաջորդ փուլի շարժիչը։ Նրա գնահատմամբ՝ Muse-ը վաղ ապացույց է, որ սպառողական AI գործակալները կարող են հասնել լայն ընդունման, ինչը բացում է դրամայնացման նոր հնարավորություններ enterprise ուղղությունից դուրս և միաժամանակ ամրապնդում է հաշվարկային հզորությունների պահանջարկը։
JPMorgan-ի թրեյդինգային ստորաբաժանումը նշել է, որ Muse-ը կրկին ուշադրության կենտրոն է բերում CPU սերվերների պահանջարկը, և դրա ֆոնին բարձրանում են INTC, AMD և ARM US Equity թիկերների շուրջ սպասումները։ Երեքշաբթի՝ ET 11:00-ի դրությամբ, Intel-ը և AMD-ն նվազեցրել էին ավելի վաղ գրանցած աճը և օրն ավարտում էին համեստ բարձրացմամբ, մինչդեռ Micron-ը աճել էր մոտ 3%-ով, իսկ Arm Holdings-ը՝ ավելի քան 1%-ով։
Morgan Stanley-ի Brian Nowak-ը գրել է, որ գործակալային առաջարկներով թվայնացվող սպառողական ծախսերի շուկան չափազանց մեծ է և բազմաշերտ։ Նրա գնահատմամբ՝ խոսքը մոտ $30 տրիլիոն սպառողական ծախսի մասին է՝ առցանց գովազդից և էլեկտրոնային առևտրից մինչև ճանապարհորդություն, սննդի առաքում և rideshare ծառայություններ։
Լարում էլեկտրոնային առևտրում
Muse-ի արագ առաջընթացն արդեն լարվածություն է ստեղծում առցանց առևտրի ոլորտում։ Ըստ հրապարակման՝ Amazon-ը այս շաբաթ արգելափակել է Muse-ը իր կայքում՝ կանխելով, որ այն օգտատերերի անունից հանդես գա որպես անձնական գնորդ և հնարավոր է՝ մրցակցի Amazon-ի սեփական AI գործակալների հետ։
Amazon-ի ներկայացուցիչը CNBC-ին ասել է, որ երրորդ կողմի հավելվածները, որոնք առաջարկում են գնումներ կատարել հաճախորդների անունից այլ բիզնեսներից, պետք է գործեն բաց և հարգեն ծառայություն մատուցողի որոշումները։ Նրա խոսքով՝ Muse-ի նման agentic երրորդ կողմի հավելվածներն ունեն նույն պարտավորությունները, և Amazon-ը Meta-ից խնդրել է հանել Amazon-ը այդ փորձառությունից։
Wall Street-ի մի շարք վերլուծաբաններ նաև կարծում են, որ Muse-ը կարող է արագացնել հավելվածների բաժանորդագրությունների դադարեցումները և ավելացնել ծրագրային ծառայություններից հրաժարումների մակարդակը։ Deutsche Bank-ի Bryan Kraft-ը նախորդ շաբաթ գրել էր, որ ամենախոցելիները, իր կարծիքով, streaming ծառայություններն ու The New York Times-ն են։ Նրա խոսքով՝ Muse-ը կարող է օգտատերերին օգնել դադարեցնել ծառայությունները խոշոր բովանդակային թողարկումների կամ մարզական սեզոնների միջև, գտնել արդեն առկա փաթեթների միջոցով հասանելի բաժանորդագրությունները և անցնել ավելի էժան սակագնային մակարդակների։
Muse-ի հաջողությունը հարցականի տակ է դնում նաև Meta-ի նոր ձևավորվող cloud բիզնեսը, որը ընկերությունը այս տարվա սկզբին ներկայացրել էր որպես ավելցուկային հաշվարկային հզորությունների դրամայնացման հնարավոր ուղի։ Evercore ISI-ի Amit Daryanani-ի կարծիքով՝ Muse-ի հաջողության պայմաններում քիչ հավանական է, որ Meta-ն ձգտի վարձակալության տալ իր ավելցուկային հզորությունները։
Աղբյուր՝ www.cnbc.com
