Meta-ի նոր Muse ԱԲ գործակալի հավելվածը ԱՄՆ-ի Apple App Store-ում անվճար սմարթֆոնային հավելվածների ցանկում բարձրացել է մրցակիցներից վեր՝ առաջ անցնելով OpenAI-ի ChatGPT-ից, Anthropic-ի Claude-ից, SpaceXAI-ի Grok-ից, ինչպես նաև Polymarket-ից, Kashi-ից և նույնիսկ Meta AI օգնականից։
Հավելվածը թողարկվել է ամսվա սկզբին։ Առաջին հինգ օրում այն ներբեռնվել է 730 հազար անգամ, իսկ Sensor Tower-ի գնահատմամբ՝ սեպտեմբերի 21-ի դրությամբ ներբեռնումները արդեն անցել են 2.5 միլիոնից։
Այդ արդյունքը գերազանցում է Claude-ի և Grok-ի մեկնարկային 13 օրվա համատեղ ցուցանիշը։ Այդ ժամանակահատվածում Claude-ը ներբեռնվել էր 400 հազար, իսկ Grok-ը՝ 200 հազար անգամ։ Նույն ժամանակահատվածում ChatGPT հավելվածի ներբեռնումները կազմել էին 3.1 միլիոն։
Apple iOS և Google Android հարթակների համար Muse-ի տարբերակները շուկա են դուրս եկել տարբեր ժամանակներում։ Այժմ iOS տարբերակի ներբեռնումները կազմում են մոտ 1.5 միլիոն, Android-ինը՝ շուրջ 1.1 միլիոն։
Meta-ն Muse-ը ներկայացնում է որպես սպառողների համար նախատեսված գործիք, որը թույլ է տալիս կառավարել թվային օգնականներին և նրանց միջոցով կատարել տարբեր առցանց առաջադրանքներ։ Ընկերության նկարագրությամբ՝ գործակալները կարող են, օրինակ, լրացնել էլեկտրոնային ձևաթղթեր և աշխատել էլեկտրոնային փոստի հետ։
ԱԲ գործակալը հիմնված է Muse Spark մոդելների ընտանիքի վրա։ Հավելվածի արագ տարածումը կարևոր արդյունք է Meta-ի համար ԱԲ գործակալների շուկայում, որը սկսել է արագ աճել անվճար OpenClaw-ի հայտնվելուց հետո։
Muse-ի հաջողության ֆոնին Meta-ի բաժնետոմսերը նախորդ օրը աճել են 11%-ով։ Մի շարք գործառույթներ հասանելի են անվճար, սակայն ընկերությունը ծրագրում է նաև առաջարկել ամսական 20 դոլար և 100 դոլար արժողությամբ վճարովի բաժանորդագրություններ՝ կախված օգտատերերի պահանջներից։
Միևնույն ժամանակ, ԱԲ գործակալների տարածման հետ ուժեղանում են նաև գաղտնիության և անվտանգության շուրջ մտահոգությունները։ Amazon-ը, օրինակ, արգելել է Muse-ի օգտագործումն իր առևտրային հարթակում՝ հղում անելով հենց այդ ռիսկերին։
Amazon-ը հայտարարել է, որ Meta-ից որևէ ծանուցում չի ստացել իր առցանց խանութում ԱԲ գործակալների միջոցով գործարքներ իրականացնելու մտադրության մասին։ Ընկերության գնահատմամբ՝ նման գործակալները շրջանցում են գնման գործընթացում կիրառվող անհատականացման գործիքներն ու այլ գործառույթները և կարող են հավաքել հաճախորդների մուտքային, անձնական և հաշիվներին վերաբերող այլ տվյալներ։
«Մենք կարծում ենք, որ երրորդ կողմի հավելվածները, որոնք առաջարկում են գնումներ կատարել այլ ընկերությունների հաճախորդների անունից, պետք է գործեն թափանցիկ և հարգեն ծառայություններ մատուցողների՝ այդ գործընթացին մասնակցելու կամ դրանից հրաժարվելու որոշումները», — նշել են Amazon-ում։
Աղբյուր՝ b24.am
