Հայաստանի կառավարությունը հանրային քննարկման է ներկայացրել որոշման նախագիծ, որով առաջարկվում է փոխել անհատույց օգտագործման տրամադրված պետական գույքի պայմանագրերի դադարեցման կանոնները։ Փոփոխությունը վերաբերում է այն դեպքերին, երբ գույքի օգտագործողը իրականացնում է գործարար ներդրումային ծրագիր, իսկ պայմանագիրը կնքված է 5 տարուց ավելի ժամկետով։
Նախագիծը մշակել է Տարածքային կառավարման և ենթակառուցվածքների նախարարության Պետական գույքի կառավարման կոմիտեն։ Փաստաթղթի հիմնավորման համաձայն՝ ներկայիս կարգավորումը թույլ է տալիս նման պայմանագիրը միակողմանի դադարեցնել՝ մյուս կողմին դրա մասին 6 ամիս առաջ ծանուցելով, ինչը ռիսկեր է ստեղծում ներդրողների համար։
Գործող կարգով անհատույց օգտագործման տրամադրված պետական գույքի պայմանագիրը կարող է դադարեցվել կառավարության որոշմամբ, կողմերի համաձայնությամբ կամ կողմերից մեկի պահանջով։ Վերջին տարբերակի դեպքում անհրաժեշտ է 6 ամիս առաջ ծանուցել մյուս կողմին։
Կառավարությունում նշում են, որ այս մեխանիզմը խնդիրներ է առաջացնում այն իրավիճակներում, երբ օգտագործողը պետական գույքի բարելավման համար խոշոր ներդրումներ է կատարում։ Ներդրողը կարող է հաշվարկել, որ գույքը կօգտագործի պայմանագրով սահմանված ամբողջ ժամկետի ընթացքում, սակայն միակողմանի դադարեցման դեպքում չհասցնի ստանալ իր ներդրումների ակնկալվող արդյունքը։
Նախագծի հեղինակների գնահատմամբ՝ նման անորոշությունը կարող է խաթարել ներդրումային ծրագրերի բնականոն ընթացքը և ֆինանսական վնաս պատճառել օգտագործողին։ Այդ պատճառով առաջարկվում է բացառություն սահմանել այն պայմանագրերի համար, որոնք կնքված են 5 տարուց ավելի ժամկետով և կապված են գործարար ներդրումային ծրագրի հետ։
Եթե փոփոխությունն ընդունվի, այդպիսի պայմանագրերը հնարավոր կլինի դադարեցնել միայն կառավարության որոշմամբ կամ կողմերի համաձայնությամբ։ Ընդ որում, կողմերի համաձայնությունը պետք է ձևակերպվի նոտարական կարգով։
Նախագծի հիմնավորման մեջ նաև նշվում է, որ դրա ընդունմամբ պետական կամ համայնքային բյուջեների եկամուտների կամ ծախսերի փոփոխություն չի նախատեսվում։
Աղբյուր՝ hetq.am
