Հայաստանի Ջրային կոմիտեում քննարկվել են Ասիական զարգացման բանկի հետ համագործակցության ընդլայնման նոր հնարավորությունները։ Կոմիտեի հաղորդմամբ՝ հանդիպման ընթացքում ADB-ի պատվիրակությունը ներկայացրել է բանկի տեխնիկական աջակցության քաղաքականության վերջին փոփոխությունները, հասանելի ֆինանսական գործիքները և աջակցության նոր մեխանիզմները։
Մասնավորապես, խոսվել է փոխհատուցվող տեխնիկական աջակցության ձևաչափի և այս ամռանը հաստատված «Կրեդիտավորում՝ ծրագրերի աջակցման համար» նոր գործիքի մասին։ Կողմերը քննարկել են, թե ինչպես կարող են այդ գործիքները կիրառվել Հայաստանի ջրային ոլորտում առաջնահերթ ծրագրերի նախապատրաստման և իրականացման փուլերում։
Քննարկված ծրագրերի շարքում նշվել են Սևանա լճի ավազանում գտնվող Գավար, Մարտունի և Վարդենիս քաղաքների մաքրման կայանների արդիականացումը, հարակից գյուղական բնակավայրերում կեղտաջրերի հավաքման և հեռացման համակարգերի ձևավորումը, ինչպես նաև Գետիկում, Կարմիրգյուղում, Գառնահովիտում և Եղվարդում նոր ջրամբարների կառուցումը։
Ջրային կոմիտեի նախագահ Արամազդ Գալամկարյանը, ընդգծելով Ասիական զարգացման բանկի ճկուն մոտեցումն ու բանկի հետ ձևավորված բազմակողմ համագործակցությունը, կարևորել է համատեղ ծրագրերի ռազմավարական դերը Հայաստանի ջրային ենթակառուցվածքների արդիականացման համար։
ADB-ի ներկայացուցիչներն էլ նշել են, որ բանկի մշակած նոր գործիքները կարող են կիրառվել տեխնիկատնտեսական հիմնավորման, մանրամասն նախագծման, տեղանքների ուսումնասիրության փուլերում, ինչպես նաև բնապահպանական և սոցիալական երաշխիքների պահանջների պահպանման ապահովման համար։ Նրանց գնահատմամբ՝ դա կօգնի պատրաստել միջազգային չափանիշներին համապատասխան որակյալ ծրագրեր։
Աղբյուր՝ finport.am
