IDBank-ը «Կողք կողքի» նախաձեռնության շրջանակում նոր գործընկերային ծրագիր է սկսել՝ աջակցելու այն ընտանիքներին, որոնք հարկադրաբար տեղահանվել են Արցախից և այժմ բնակվում են Սևան համայնքում։ Այդ մասին հայտնում է բանկի մամուլի ծառայությունը։
Բանկը և «Դեկավվա» բարեգործական հիմնադրամը միավորել են ջանքերը, որպեսզի նպաստեն այդ ընտանիքների սոցիալ-տնտեսական ինտեգրմանը և ստեղծեն կրթություն ստանալու ու աշխատանքի տեղավորման գործնական հնարավորություններ։
IDBank-ի հաղորդակցության և կայուն զարգացման բաժնի ղեկավար Տաթևիկ Վարդևանյանի խոսքով՝ ծրագրի նոր փուլը նախատեսում է աշխատանք ընտանիքի յուրաքանչյուր անդամի հետ՝ երեխաներից մինչև մեծահասակներ։ Նրա խոսքով, նպատակն է օգնել ընտանիքներին լուծել թե՛ սոցիալական, թե՛ տեղական համայնքներում ինտեգրման հետ կապված հարցերը և հասնել շոշափելի ու կայուն արդյունքների։
Վարդևանյանը նշել է նաև, որ «Harehas» նախագիծը կարող է կարևոր ներդրում ունենալ Արցախից տեղահանված հայրենակիցների ապագայի համար։
«Դեկավվա» (Dekavva Fund) բարեգործական հիմնադրամի համահիմնադիր և գործադիր տնօրեն Ադրիանա Մարությանի խոսքով՝ ծրագրի շրջանակում հաշվի են առնվելու յուրաքանչյուր ընտանիքի կարիքներն ու խնդիրները, և աշխատանքը տարվելու է անհատական մոտեցմամբ։
Նրա գնահատմամբ՝ քանի որ «Harehas»-ը համայնքահեն ծրագիր է, Արցախից տեղահանված մարդիկ կկարողանան իրենց բնակության յուրաքանչյուր բնակավայրում ստեղծել և զարգացնել նոր նախաձեռնություններ՝ լինի դա նախագիծ, սեփական բիզնես կամ այլ սկսնակ գործունեություն։ «Մենք ամեն օր տեսնում ենք նրանց մեծ ներուժը և փորձում ենք նպաստել դրա զարգացմանը», — ասել է Մարությանը։
IDBank-ը «Կողք կողքի» ծրագրով 2023 թվականից շարունակական աջակցություն է ցուցաբերում Արցախից հարկադրաբար տեղահանված ընտանիքներին՝ առանձնահատուկ ուշադրություն դարձնելով նրանց ինտեգրմանը և օգնելով ոտքի կանգնել ու իրենց ապագան կառուցել Հայաստանում։ Վերջերս բանկը նաև վճարել է ԵՊՀ-ում սովորող Արցախից 103 ուսանողի ուսման վարձը։
Տաթևիկ Վարդևանյանի խոսքով՝ եթե սկզբնական փուլում աջակցությունը հիմնականում սոցիալական էր և ուղղված էր առօրյա հիմնական ծախսերի փոխհատուցմանը, ապա հետագայում շեշտը դրվել է կրթության, մասնագիտական պատրաստման և նոր մասնագիտություն ձեռք բերելու վրա։ Նրա խոսքով, դա պետք է օգնի շահառուներին գտնել կայուն աշխատանք և հետագայում ինքնուրույն լուծել իրենց սոցիալական խնդիրները։
Մոտ ապագայում բանկը այդ համայնքներում նաև կանցկացնի ֆինանսական գրագիտության դասընթացներ՝ օգնելու ընտանիքներին ձեռք բերել գիտելիքներ, որոնք անհրաժեշտ են կշռադատված և հիմնավորված ֆինանսական որոշումներ ընդունելու համար։
IDBank-ը կարգավորվում է ՀՀ ԿԲ-ի կողմից։
Աղբյուր՝ armbanks.am
