Հայաստանի էկոնոմիկայի նախարար Գևորգ Պապոյանը սեպտեմբերի 22-ին Երևանում հանդիպել է Չեռնոգորիայի զբոսաշրջության նախարար Simonida Kordić-ին։ Հանդիպումը տեղի է ունեցել Բժշկական տուրիզմի միջազգային ֆորումի շրջանակում։
Կողմերը քննարկել են Հայաստանի և Չեռնոգորիայի միջև զբոսաշրջության ոլորտում համագործակցության ընդլայնման հնարավորությունները։ Զրույցը վերաբերել է երկկողմ զբոսաշրջային հոսքերի ավելացմանը, ինչպես նաև նոր ուղղությունների զարգացմանը։
Գևորգ Պապոյանը նշել է, որ Հայաստանը շարունակում է քայլեր ձեռնարկել միջազգային ուղևորափոխադրումների խթանման և երկրի հասանելիության բարելավման ուղղությամբ։ Նրա խոսքով՝ միաժամանակ ներդրումներ են արվում նաև զբոսաշրջային ենթակառուցվածքների զարգացման համար։
Քննարկման առանձին թեմա է դարձել գյուղական տուրիզմը, որը կողմերը դիտարկել են որպես համագործակցության խոստումնալից ուղղություն։ Այս համատեքստում նախարարը կարևորել է Չեռնոգորիայի փորձի ուսումնասիրությունն ու մասնագիտական գիտելիքի փոխանակումը։
Պաշտոնյաները քննարկել են նաև փոխադարձ հետաքրքրություն ներկայացնող այլ հարցեր՝ անդրադառնալով հետագա համագործակցության խորացման և նոր հնարավորությունների ստեղծման հեռանկարներին։
Հանդիպմանը մասնակցել է նաև Հայաստանի էկոնոմիկայի նախարարության Զբոսաշրջության կոմիտեի նախագահ Անուշիկ Ավետյանը։
Աղբյուր՝ www.pan.am
