Betfred բուքմեյքերական բիզնեսի հիմնադիր Ֆրեդ Դանը, որը ճանաչվել է Մեծ Բրիտանիայի խոշորագույն հարկատուն, հայտարարել է, որ այլևս չէր ցանկանա ծնվել Միացյալ Թագավորությունում։ Financial Times-ին տված հարցազրույցում նա դժգոհել է ինչպես հարուստների նկատմամբ հարկային մոտեցումից, այնպես էլ խաղային ոլորտի կարգավորումից։
Sunday Times-ի ամենահարուստների վարկանիշի համաձայն՝ Ֆրեդ Դանի և նրա եղբոր՝ Փիթերի համատեղ կարողությունը կազմում է 3.61 մլրդ ֆունտ ստերլինգ (4.2 մլրդ եվրո)։ 83-ամյա գործարարը նշել է, որ ինքն արդեն չափազանց ծեր է երկիրը լքելու համար, սակայն չի փորձի իր երեխաներին հետ պահել ավելի մեղմ հարկային ռեժիմ ունեցող երկրներ տեղափոխվելուց։
Դանը հիշեցրել է, որ անցյալ տարի իր ընտանիքը վճարել է 400 մլն ֆունտ ստերլինգ (466.4 մլն եվրո) հարկ։ Նրա խոսքով՝ հարուստներից անընդհատ ավելի մեծ հարկային բեռ պահանջելու քաղաքականությունը հասել է մի կետի, երբ գործարարները սկսում են մտածել կապիտալն ու բնակության վայրը փոխելու մասին։
Բրիտանիայից կապիտալի արտահոսքի թեման ավելի սրվեց այն բանից հետո, երբ անցյալ տարի երկիրը հրաժարվեց non-dom ռեժիմից, որը օտարերկրյա եկամուտներն ազատում էր հարկումից։ Նյութում նշվում է, որ Rokos Capital Management հեջ-ֆոնդի հիմնադիր Քրիս Ռոկոսը, որը խոշոր հարկատուների ցուցակում երրորդն է, տեղափոխվել է Հունաստան։ Երկիրը լքել են նաև պողպատի մագնատ Լակշմի Միթալը և Եգիպտոսի ամենահարուստ մարդ Նասեֆ Սավիրիսը։
Այս իրավիճակում ֆինանսների նախարար Ջոն Հիլին ծրագրում է բարձրացնել խաղային ավտոմատների հարկը։ Դանը, որն այս տարի եղբոր հետ միասին Sunday Times-ի վարկածով գլխավորել է խոշորագույն հարկատուների վարկանիշը, նախազգուշացրել է, որ եթե դրույքաչափը 20%-ից բարձրացվի մինչև 40%, Betfred-ը ստիպված կլինի փակել 1094 խաղադրույք ընդունող կետերից 495-ը։
Նրա գնահատմամբ՝ այդ սցենարը կհանգեցնի 2575 աշխատատեղի կորստի և պետական բյուջե հարկային մուտքերի 67 մլն ֆունտով (78.1 մլն եվրո) կրճատման։
Աղբյուր՝ b24.am
