Եվրոպական հանձնաժողովի նախագահ Ուրսուլա ֆոն դեր Լեյենը Բաքվում հայտարարել է մի շարք առանցքային ուղղություններով Եվրոպական Միության և Ադրբեջանի միջև գործընկերությունը խորացնելու ծրագրերի մասին։ Այս մասին նա գրել է X սոցիալական հարթակում։
«ԵՄ-ն հավատում է Հարավային Կովկասի պայծառ ապագային՝ խաղաղ և բարգավաճ։ Մենք ցանկանում ենք օգնել կառուցել այս ապագան։ Ես նույնպես այստեղ եմ՝ ԵՄ և Ադրբեջանի միջև գործընկերությունը խորացնելու համար։ Առևտրից մինչև տրանսպորտ։ Էներգետիկայից մինչև տնտեսություն»,- նշել է նա։
Եվրահանձնաժողովի ղեկավարը հուլիսի 1-ին աշխատանքային այցով ժամանել է Ադրբեջան, որտեղ բանակցություններ կանցկացնի այդ երկրի նախագահ Իլհամ Ալիևի հետ։ Հուլիսի 2-ին Ֆոն դեր Լեյենը ժամանելու է Հայաստան, որտեղ նախատեսված է նրա հանդիպումը վարչապետ Նիկոլ Փաշինյանի հետ։
Աղբյուր՝ 168.am
