Եվրոպական կենտրոնական բանկը հայտարարել է, որ եվրոգոտում նոր եվրո թղթադրամները շրջանառության մեջ կմտնեն 2030-ականների սկզբից։ Կարգավորիչի հաղորդագրության համաձայն՝ դրանք կթողարկվեն փուլային եղանակով։
ԵԿԲ-ն նշում է, որ նոր թղթադրամները կունենան կատարելագործված պաշտպանիչ տարրեր, կլինեն ավելի էկոլոգիական և օգտագործման տեսանկյունից ավելի հարմար։ Բանկում ընդգծում են, որ նոր շարքի մշակման նպատակը կանխիկ դրամի անվտանգության և գործնականության բարձրացումն է։
Թղթադրամների նոր տեսքին նվիրված հարցմանը, ըստ ԵԿԲ-ի, մասնակցել է Եվրոպայում և նրա սահմաններից դուրս բնակվող շուրջ 10 միլիոն մարդ։ Մասնակիցներին առաջարկվել էր գնահատել դիզայնի 10 տարբերակ, որոնք միավորված էին «Եվրոպական մշակույթ» և «Գետեր ու թռչուններ» թեմաների շուրջ։
Վերջնական դիզայնի հարցում որոշումը կընդունի ԵԿԲ-ի կառավարիչների խորհուրդը։ Այն հաշվի կառնի հանրային հարցման արդյունքները, տեխնիկական գնահատականը և անկախ ժյուրիի առաջարկությունները։ ԵԿԲ-ի տվյալներով՝ այդ որոշումը նախատեսվում է կայացնել 2026 թվականի վերջին։
Միաժամանակ ԵԿԲ-ն պարզաբանել է, որ արդեն շրջանառվող եվրո թղթադրամները կպահպանեն օրինական վճարամիջոցի կարգավիճակը և կշարունակեն օգտագործվել նոր շարքի հետ զուգահեռ։
Աղբյուր՝ b24.am
