Էլ Նինյոն կարող է փոխել Եվրոպայում գազի պահանջարկի հաշվարկները

Եվրոպայում այս տարի եղանակային պայմանները կարող են էական ազդեցություն ունենալ էներգետիկ շուկայի վրա։ Thomson Reuters-ի փոխանցմամբ՝ Էլ Նինյո կլիմայական երևույթը կարող է բերել ռեկորդային ուժգնության քամիների, ինչը կվերանայի տարածաշրջանում բնական գազի պահանջարկի կանխատեսումները։

Էլ Նինյոն կապված է Խաղաղ օվկիանոսի կենտրոնական հատվածում ջրի մակերևույթի տաքացման հետ և ազդում է ամբողջ մոլորակի եղանակային համակարգերի վրա։ Եվրոպայի համար դրա հիմնական հետևանքներից կարող են լինել ավելի տաք ձմեռները և արևմտյան քամիների ուժեղացումը։ Այդ սցենարի դեպքում հողմային էներգետիկան լրացուցիչ խթան կստանա, իսկ կոմունալ ծառայություններ մատուցող ընկերությունները կարող են կրճատել բնական գազի սպառումը։

Օդերևութաբանները 2026 թվականին սպասում են հատկապես ուժեղ Էլ Նինյո։ Համաշխարհային օդերևութաբանական կազմակերպության գլխավոր քարտուղար Սելեստե Սաուլոն հայտարարել է, որ այս տարվա ցուցանիշները կարող են նույնիսկ ռեկորդային լինել։

Nebbo օդերևութաբանական ծառայության տվյալներով՝ Էլ Նինյոյի գագաթնակետը սպասվում է նոյեմբերից հունվար։ Սա նշանակում է, որ դրա հետևանքով առաջացող եղանակային անոմալիաները կդրսևորվեն նաև ձմռան ամիսներին։ Nebbo-ի տեխնոլոգիական բաժնի ղեկավար Ժերար Կաստրոյի խոսքով՝ ձմեռային Էլ Նինյոյի պայմաններում Հյուսիսային Ատլանտյան օվկիանոսի կենտրոնական հատվածում գրանցվում են ճնշման բացասական անոմալիաներ։

Դա, նրա բացատրությամբ, փոխում է բարձրադիր արագ հոսանքի՝ ջեթ հոսքի ուղղությունը, ինչի հետևանքով Մեծ Բրիտանիայում, Հյուսիսային ծովում, Իռլանդիայում և Սկանդինավիայում արևմտյան քամիներն ուժեղանում են։ Եթե այս կանխատեսումները հաստատվեն, ապա Եվրոպայի հողմային էլեկտրակայանները, հատկապես Հյուսիսային ծովում, ինչպես նաև Գերմանիայում, Մեծ Բրիտանիայում և Ֆրանսիայում, 2026 թվականի վերջին կարող են զգալիորեն ավելացնել էլեկտրաէներգիայի արտադրությունը։

Այդպիսի զարգացումը կարևոր շրջադարձ կլինի ոլորտի համար, քանի որ վերջին մի քանի տարիներին հողմային էներգետիկան ցուցադրել էր համեմատաբար թույլ արդյունքներ։

Աղբյուր՝ b24.am