Եվրոհամակարգը գործարկել է Pontes լուծումը, որը հնարավորություն է տալիս թոքենացված ակտիվներով մեծածախ գործարքների հաշվարկներն իրականացնել կենտրոնական բանկի փողերով։ Այդ մասին հայտնել է Եվրոպական կենտրոնական բանկը (ԵԿԲ)։
Pontes-ը միացնում է բաշխված ռեեստրի տեխնոլոգիա (DLT) օգտագործող շուկայական հարթակները Եվրոհամակարգի TARGET վճարահաշվարկային ենթակառուցվածքին։ ԵԿԲ-ում նշում են, որ դրա գործարկումը Եվրոհամակարգի ռազմավարության առաջին փուլն է, որի նպատակն է կենտրոնական բանկի փողերը հարմարեցնել թոքենացված ֆինանսական շուկաների զարգացմանը։
«Եվրոհամակարգը աշխատում է թվային դարաշրջանում ավելի ինտեգրված, նորարարական և կայուն եվրոպական ֆինանսական շուկա ձևավորելու ուղղությամբ», - ասել է ԵԿԲ նախագահ Կրիստին Լագարդը։
Սկզբնական փուլում Pontes-ը կտրամադրի ծառայությունների հիմնական փաթեթ։ Համակարգի գործառույթներն ու աշխատանքի տևողությունը աստիճանաբար կընդլայնվեն՝ հաշվի առնելով շուկայի պահանջարկն ու տեխնոլոգիական զարգացումը։ Լուծման լիարժեք ներդրումը սպասվում է 2028 թվականին։
ԵԿԲ-ն նաև հայտնել է, որ սկսել է նախապատրաստական աշխատանքներ՝ սեփական միջոցների փոքր մասը թոքենացված արժեթղթերում ներդնելու համար։ Նման գործարքների հաշվարկները նախատեսվում է կատարել կենտրոնական բանկի փողերով՝ Pontes-ի միջոցով։
Առաջին փուլում ներդրումները կկենտրոնանան եվրոյով արտահայտված արժեթղթերի վրա, որոնք թողարկվել են եվրոգոտու երկրների կենտրոնական և տարածաշրջանային իշխանությունների, պետական գործակալությունների և եվրոպական վերազգային հաստատությունների կողմից։
ԵԿԲ-ում պարզաբանել են, որ այդ ներդրումները կարգավորողին թույլ կտան գործնական փորձ ստանալ բաշխված ռեեստրի տեխնոլոգիայի կիրառման հարցում ներդրումային գործընթացի տարբեր փուլերում՝ ներառյալ գործարքների կնքումը, հաշվարկները և պորտֆելի կառավարումը։
Նախապատրաստական աշխատանքի ավարտից հետո ԵԿԲ-ի Գործադիր խորհուրդը, հաշվի առնելով թոքենացված արժեթղթերի շուկայի զարգացումը, կսահմանի ներդրումների մեկնարկի գործառնական պարամետրերն ու ժամկետները։
Աղբյուր՝ armbanks.am
