Չինաստանը, վերլուծաբանների գնահատմամբ, մինչև 2035 թվականը կունենա աշխարհի ամենաակտիվ և ազդեցիկ միջուկային էներգետիկայի ոլորտը։ Թեև ներկայումս միջուկային էլեկտրաէներգիայի խոշորագույն արտադրողը դեռ ԱՄՆ-ն է, Չինաստանի հզորությունների աճի տեմպը այն դիրքավորում է որպես առաջիկա տասնամյակի գլխավոր առաջատար։
OilPrice-ի հրապարակման համաձայն՝ վերջին տասը տարում Չինաստանն ավելացրել է 34 գիգավատ միջուկային հզորություն, մինչդեռ ԱՄՆ-ում շահագործման է հանձնվել միայն մեկ նոր ատոմակայան՝ Georgia նահանգի երկար ձգձգված Plant Vogtle-ը։ Gavekal Technologies-ի էներգետիկայի վերլուծաբան Damien Ma-ի խոսքով՝ շինարարական արդյունավետությունը Չինաստանին թույլ է տալիս նոր կայան կառուցել մոտ վեց տարում, մինչդեռ ԱՄՆ-ի վերջին Vogtle ռեակտորների դեպքում դրա համար պահանջվել է ավելի քան մեկ տասնամյակ։
Հրապարակման մեջ նշվում է, որ Պեկինի վերջին հնգամյա ծրագիրը ցույց է տալիս՝ երկիրը չի պատրաստվում դանդաղեցնել զարգացումը։ Center for Strategic and International Studies (CSIS)-ը գնահատում է, որ միջուկային էներգետիկան Չինաստանի համար միաժամանակ ծառայում է էներգետիկ անվտանգության, տեխնոլոգիական նորարարության և միջազգային ներգրավվածության նպատակներին։
Չինաստանի ռազմավարությունը չի սահմանափակվում միայն ավանդական ատոմային հզորությունների ընդլայնմամբ։ Երկիրը նաև արագորեն ուժեղացնում է իր դիրքերը առաջադեմ միջուկային տեխնոլոգիաներում՝ ձգտելով կառուցել ամբողջական էկոհամակարգ՝ ռեակտորների նախագծումից և վառելիքային լուծումներից մինչև արդյունաբերական կիրառություններ։ Power Magazine-ը մարտին գրել էր, որ Չինաստանը ձևավորում է ուղղահայաց ինտեգրված առաջադեմ միջուկային համակարգ՝ սկսած թորիումի տեխնոլոգիաներից մինչև supercritical CO2 generation:
Միևնույն ժամանակ ԱՄՆ-ն ևս հայտարարում է, որ ցանկանում է ամրապնդել իր հնացող միջուկային ոլորտը և ավելացնել ներկայությունը համաշխարհային շուկայում։ Հրապարակման համաձայն՝ ԱՄՆ վարչակազմը խոսում է հաջորդ սերնդի ռեակտորների և միջուկային միաձուլման տեխնոլոգիաների զարգացման մասին, ինչպես նաև փորձում է նվազեցնել կախվածությունը միջազգային միջուկային վառելիքի մատակարարման շղթաներից՝ զարգացնելով ուրանի արդյունահանման և հարստացման ներքին կարողությունները։ Սակայն ծախսերի և տեխնոլոգիական կարողությունների առումով ամերիկյան առաջադեմ միջուկային հատվածը դեռ հետ է մնում Չինաստանից։
Հոդվածում առանձնացվում է նաև այս շաբաթ տեղի ունեցած կարևոր քայլը. Չինաստանը համաձայնագիր է ստորագրել International Atomic Energy Agency (IAEA)-ի հետ՝ ավելի լայնորեն կիսվելու բարձր ջերմաստիճանային գազով սառեցվող ռեակտորների՝ HTGR-ների վերաբերյալ իր փորձով։ Այս տեսակի չորրորդ սերնդի ռեակտորները կարող են աշխատել շատ բարձր ջերմաստիճաններում և կիրառվել ոչ միայն էլեկտրաէներգիայի արտադրության, այլև արդյունաբերական ջերմության մատակարարման համար։
Ըստ հրապարակման՝ նոր համաձայնագիրը ներառում է համագործակցություն HTGR-ների հետազոտության և զարգացման, ռեակտորների նախագծման, շինարարության, գործարկման և շահագործման ուղղություններով, ինչպես նաև մատակարարման շղթաների և անձնակազմի պատրաստման վերաբերյալ տեղեկատվության փոխանակում։ Այս քայլը կարող է այլ երկրներին ավելի մեծ հասանելիություն տալ Չինաստանի ինժեներական փորձին այն ժամանակ, երբ աճում է հետաքրքրությունը այնպիսի միջուկային համակարգերի նկատմամբ, որոնք կարող են ապահովել ինչպես էլեկտրաէներգիա, այնպես էլ բարձր ջերմաստիճանային արդյունաբերական ջերմություն։
Հոդվածի եզրակացությամբ՝ այս բացումը կարող է դառնալ ավելի համագործակցային մոտեցման սկիզբ՝ մի ժամանակաշրջանում, երբ կլիմայական փոփոխությունը և արհեստական բանականության աճող էներգապահանջը մեծացնում են անընդհատ մաքուր էներգիայի կարիքը։
Աղբյուր՝ oilprice.com
