BYD-ը սկսել է Fang Cheng Bao շարքի նոր Formula S կուպեի և S GT ունիվերսալի վաճառքը։ Ընկերությունը նշում է, որ երկու մոդելներն էլ նախատեսված են տարբեր ճանապարհային պայմաններում բարձր հարմարավետություն ապահովելու համար։
Երկու ավտոմեքենաների հիմնական տարբերությունը թափքի հետևի հատվածի ձևավորումն է։ Formula S կուպեի երկարությունը 5060 մմ է, լայնությունը՝ 1967 մմ, բարձրությունը՝ 1483 մմ, իսկ անվային բազան՝ 2960 մմ։ S GT ունիվերսալն ավելի կոմպակտ է՝ 5025 մմ երկարությամբ, 1967 մմ լայնությամբ և 1458 մմ բարձրությամբ, մինչդեռ անվային բազան պահպանվել է նույնը։
Կուպեի բազային տարբերակը համալրված է մեկ էլեկտրաշարժիչով՝ մինչև 329 ձիաուժ հզորությամբ։ Որպես լրացուցիչ տարբերակ առաջարկվում է 402 ձիաուժանոց շարժիչ, որը ունիվերսալի բազային տարբերակի ստանդարտ համալրումն է։ Երկու մոդելների ամենահզոր տարբերակներն ունեն երկու էլեկտրաշարժիչ, որոնց համատեղ հզորությունը հասնում է 657 ձիաուժի։
Formula S կուպեի մեկնարկային գինը 189 900 յուան է, իսկ S GT ունիվերսալինը՝ 219 900 յուան։ Երկու մեքենաներն էլ ստացել են երկրորդ սերնդի Blade մարտկոց, որն աջակցում է գերարագ լիցքավորմանը։ Ըստ ներկայացված տվյալների՝ լիցքավորման մակարդակը 10%-ից մինչև 97% կարելի է հասցնել ընդամենը 9 րոպեում, իսկ ընթացքի պաշարը կարող է հասնել 900 կմ-ի։
Formula S-ը դարձել է Fang Cheng Bao ապրանքանիշի առաջին մոդելը, որը հագեցած է ինտելեկտուալ մագնիսառեոլոգիական կախոցով։ Համակարգը կարող է միլիվայրկյանի ճշգրտությամբ փոխել ամորտիզացիայի ուժգնությունը՝ նախապես արձագանքելով ճանապարհածածկի փոփոխություններին և բարելավելով թե՛ հարմարավետությունը, թե՛ կառավարելիությունը։
Նոր մոդելները նաև համալրվում են BYD-ի ինքնավար կառավարման համակարգի վերջին տարբերակով։ Այն աջակցում է տարբեր սցենարների ավտոմատ վարմանը, այդ թվում՝ խաչմերուկներում շրջադարձերին, գլխավոր ճանապարհից դուրս գալուն և ավտոմատ կայանմանը։
Լրացուցիչ հնարավորությունների թվում են 26-դյույմանոց լրացված իրականությամբ պրոյեկցիոն էկրանը, կոմպակտ սառնարանը և պրեմիում դասի աուդիոհամակարգը։ BYD-ը գնորդներին առաջարկում է նաև մի քանի ոչ ստանդարտ աքսեսուար, այդ թվում՝ կախոցի մագնիսական լամպեր և ֆիզիկական կոճակներով բլոկ, որը ամրացվում է սենսորային էկրանին՝ որոշ գործառույթների արագ գործարկման համար։
Աղբյուր՝ b24.am
