Jeff Bezos-ը մեծացնում է իր մասնակցությունը տիեզերական բիզնեսում։ Wall Street Journal-ի տվյալներով՝ Amazon-ի հիմնադիրը 2000 թվականին Blue Origin-ի ստեղծումից ի վեր ընկերությունում ընդհանուր առմամբ ներդրել է 32 մլրդ դոլար՝ նախագիծը ֆինանսավորելով Amazon-ի բաժնետոմսերի ռազմավարական վաճառքների միջոցով։
Blue Origin-ը, որը երկար ժամանակ դիտվում էր որպես մասնավոր և բարձր հավակնություններով նախաձեռնություն, այժմ անցնում է նոր փուլի՝ ձևավորվելով որպես առևտրային տիեզերական շուկայի խոշոր խաղացող։ 140 մլրդ դոլար գնահատված ընկերությունն առաջին անգամ ներգրավում է արտաքին կապիտալ։ Ֆինանսավորման ընթացիկ փուլում արդեն հավաքագրվել է 10 մլրդ դոլար, որից 2 մլրդ դոլարը ներդրել է անձամբ Bezos-ը, իսկ լրացուցիչ պարտավորությունները կարող են այդ ծավալն ավելի մեծացնել։
Գլխավոր գործադիր տնօրեն Dave Limp-ը վերակազմավորում է շուրջ 15 հազար աշխատակից ունեցող ընկերությունը՝ այն հարմարեցնելով նոր նպատակներին։ Կառավարումը դիմում է թիրախային կրճատումների և դադարեցնում է ենթաուղեծրային զբոսաշրջային թռիչքները, որպեսզի ռեսուրսները կենտրոնացնի հիմնական տեխնոլոգիական մշակումների և NASA-ի հետ կնքված կարևոր պայմանագրերի կատարման վրա։
Վերափոխման այս փուլը ուղեկցվում է նաև բարձր ֆինանսական սպասումներով։ 2025 թվականին 800 մլն դոլար եկամուտ ստանալուց հետո Blue Origin-ը ընթացիկ տարում նպատակադրում է հասնել 1.4 մլրդ դոլարի։ Ընկերության ներքին կանխատեսումների համաձայն՝ մինչև 2030 թվականը տարեկան եկամուտը կարող է գերազանցել 30 մլրդ դոլարը։
Աղբյուր՝ b24.am
