Հայաստանում Binance-ի օգտատերերի շրջանում անցկացված հարցումը ցույց է տվել, որ կրիպտոակտիվները երկրում գնալով ավելի հաճախ կիրառվում են ոչ միայն ներդրումների, այլև առօրյա ֆինանսական խնդիրների լուծման համար։ Ամենապահանջված օգտագործման ուղղություններն են միջազգային փոխանցումները, վճարումները և խնայողությունները, մինչդեռ շուկայի նկատմամբ կայուն վստահությունը դեռևս ձևավորման փուլում է։
Հետազոտությունն անցկացվել է 2026 թվականի օգոստոս և սեպտեմբեր ամիսներին՝ Հայաստանի տարբեր մարզերից ավելի քան 100 մասնակցի ներգրավմամբ։ Հարցման համաձայն՝ 77.1%-ը նշել է, որ Հայաստանում կրիպտոարժույթների նկատմամբ հետաքրքրությունն աճել է, իսկ 22.9%-ը այդ աճը գնահատել է որպես զգալի։ Բացի այդ, 57.3%-ը հայտնել է, որ վերջին երկու տարում սկսել է ավելի ակտիվ օգտագործել կրիպտոարժույթները։
Օգտագործման հիմնական նպատակները
Երբ հարցվածներին թույլատրվել է ընտրել մի քանի տարբերակ, առավել հաճախ նշվել են միջազգային փոխանցումները՝ 56.3% և ներդրումներն ու թրեյդինգը՝ 55.2%։ Դրանց հաջորդել են խնայողությունների կուտակումը՝ 45.8% և ապրանքների ու ծառայությունների դիմաց վճարումները՝ 42.7%։
Ավելի սահմանափակ, բայց տեսանելի կիրառություն ունեն սթեյքինգն ու DeFi-ն՝ 18.8%, ինչպես նաև գնաճից պաշտպանվելու նպատակով օգտագործումը՝ 19.8%։ Եթե հաշվի առնվի միայն մեկ առաջնահերթ նպատակ, առաջին տեղում կրկին միջազգային փոխանցումներն են՝ 33.3%, ապա՝ վճարումները՝ 24% և ներդրումները՝ 22.9%։
Հարցվածների անձնական ֆինանսներում կրիպտոարժույթները 34.4%-ի համար լրացուցիչ եկամտի աղբյուր են, իսկ 18.8%-ի համար արդեն դարձել են միջոցների հիմնական աղբյուրը։
Ընկալումները և հիմնական խոչընդոտները
Հարցման մասնակիցների 27.1%-ը կրիպտոարժույթներն առաջին հերթին կապում է ազատության և անկախության հետ, 22.9%-ը՝ ներդրումների, իսկ 21.9%-ը՝ արագ եկամուտ ստանալու հնարավորության։ Միայն 10.4%-ն է դրանք նախ և առաջ դիտարկում որպես ռիսկի կամ խարդախության հետ կապված գործիք։
Միևնույն ժամանակ, առավել ակտիվ օգտագործման գլխավոր արգելք է համարվել գիտելիքների պակասը՝ 38.5%։ Դրան հետևում են շուկայական ռիսկերն ու տատանողականությունը՝ 27.1%։ Խարդախության բախվելու վտանգը համեմատաբար քիչ է նշվել՝ 6.3%։
Օգտատերերի ակնկալիքների թվում առաջին տեղում շուկայի մասին գիտելիքների ընդլայնումն է՝ 28.1%։ Դրան հաջորդում են ավելի հստակ կարգավորումը՝ 18.8%, օգտատիրական միջերեսների պարզեցումը՝ 16.7%, անվտանգության մակարդակի բարձրացումը՝ 15.6% և միջնորդավճարների նվազեցումը՝ 12.5%։ Հարցվածների 29.2%-ը նաև կարծում է, որ շուկայի զարգացումն արագացնելու կարևոր նախապայման է հասկանալի կարգավորումը։
Սպասումները առաջիկա տարիների համար
Չնայած ներկա իրավիճակի զուսպ գնահատականին՝ հարցվածների սպասումները շարունակում են դրական լինել։ Ընդհանուր առմամբ 83.3%-ը կարծում է, որ առաջիկա 3–5 տարիներին կրիպտոարժույթները Հայաստանում ավելի լայն տարածում կստանան, իսկ 89.6%-ը համոզված է, որ թվային ակտիվները ամբողջությամբ կամ մասամբ կդառնան ապագայի ֆինանսական համակարգի մաս։
Հինգ տարի անց առավել զանգվածային կիրառման ուղղություն հարցվածներն ամենից հաճախ նշել են վճարումները՝ 34.4%։ Դրանց հաջորդում են խնայողությունները՝ 28.1% և փոխանցումները՝ 16.7%։ Միաժամանակ, 42.7%-ը սպասում է, որ այդ ընթացքում կրիպտոարժույթները կդառնան իրենց առօրյա կյանքի մաս։
Մասնակիցների կարծիքով՝ առավել արագ զարգացող ոլորտների թվում առաջատար են վճարումներն ու փոխանցումները՝ 54.2%, ինչպես նաև NFT-ները և մետատիեզերքները՝ 42.7% ու GameFi-ն՝ 41.7%։
Binance-ի տարածաշրջանային ղեկավար Կիրիլ Խոմյակովը նշել է, որ Հայաստանում նկատվում է բարձր հետաքրքրություն թվային ակտիվների և դրանց գործնական օգտագործման նկատմամբ, իսկ օգտատերերի համար կարևոր են ոչ միայն ներդրումային հնարավորությունները, այլև փոխանցումների, վճարումների և խնայողությունների հարմար գործիքները։ Նրա խոսքով՝ Binance-ը կշարունակի ընդլայնել իր պրոդուկտների և կրթական ռեսուրսների հասանելիությունը երկրում։
Հարցման արդյունքները ցույց են տալիս, որ Հայաստանում կրիպտոշուկան անցում է կատարում նախնական հետաքրքրությունից դեպի ավելի գործնական օգտագործում։ Միաժամանակ, ոլորտի հետագա աճի համար առանցքային պայմաններ են մնում հասկանալի կարգավորումը, ֆինանսական կրթության զարգացումը և օգտատիրական փորձառության պարզեցումը։
Աղբյուր՝ b24.am
