Ավստրալիայի կառավարությունը արհեստական բանականությունը համարում է այն գործոններից մեկը, որը կարող է խթանել երկրի տնտեսական աճը առաջիկա 40 տարիներին։ Bloomberg-ի փոխանցմամբ՝ այդ գնահատականը ներկայացված է Ավստրալիայի ֆինանսների նախարարության հրապարակած «Միջսերնդային զեկույց 2026»-ում։
Փաստաթղթում նշվում է, որ արհեստական բանականության տարածումն ու կիրառումը, հավանաբար, կօգնեն ապահովել երկարաժամկետ կանխատեսման մեջ ներառված աշխատանքի արտադրողականության տարեկան 1.2% աճը։ Նույն ցուցանիշը օգտագործվել էր նաև 2023 թվականի զեկույցում։
Ավստրալիայի ֆինանսների նախարար Ջիմ Չալմերսը, զեկույցը ներկայացնելով Ավստրալիայի ազգային համալսարանում, հայտարարել է, որ 2010-ականների առավելությունները՝ Չինաստանի կողմից հումքային ապրանքների պահանջարկը, կրթությունն ու զբոսաշրջությունը, առաջիկայում կարող են փոխարինվել այլ աղբյուրներով։ Նրա խոսքով՝ խոսքը վերաբերում է վերականգնվող էներգետիկային, կարևոր նշանակության օգտակար հանածոներին, ուժեղ ինստիտուտներին ու ռազմավարական գործընկերություններին, ինչպես նաև ծառայությունների ոլորտում արհեստական բանականության կիրառմամբ ձևավորվող նոր առավելություններին։
Չալմերսին հարցրել են նաև, թե ինչու է ֆինանսների նախարարությունը պահպանել աշխատանքի արտադրողականության աճի հենց 1.2% կանխատեսումը։ Նախարարն ասել է, որ իրական ցուցանիշը կարող է ավելի բարձր լինել, սակայն գերատեսչությունը այդ սցենարը գնահատում է որպես հավասարակշռված մոտեցում։
Զեկույցում առանձնացվում է նաև տվյալների կենտրոնների կառուցման ազդեցությունը տնտեսության վրա։ Westpac Banking Corp.-ի գնահատմամբ՝ այս աճը իր մասշտաբով համադրելի է 2010-ականների սկզբի հեղուկացված բնական գազի ոլորտի ընդլայնման հետ։
Միևնույն ժամանակ, կարճաժամկետ հատվածում տվյալների կենտրոնների արագ զարգացումը կարող է խորացնել ռեսուրսների և արտադրական հզորությունների պակասը։ Ըստ հրապարակման՝ այդ սահմանափակումներն արդեն նպաստել են գնաճի արագացմանը և ստիպել Ավստրալիայի պահուստային բանկին բարձրացնել տոկոսադրույքները։
«Միջսերնդային զեկույց 2026»-ի համաձայն՝ մինչև 2060-ականների կեսերը Ավստրալիայի տնտեսական աճի միջին տարեկան տեմպը կնվազի մինչև 2%՝ նախորդ 40 տարիների 3%-ի համեմատ։
Աղբյուր՝ b24.am
