Advanced Micro Devices (AMD)-ի բաժնետոմսերը երկուշաբթի աճել են 9%-ով, ինչի արդյունքում ընկերության շուկայական արժեքը առաջին անգամ գերազանցել է $1 տրլն-ը։ Օրվա ընթացքում բաժնետոմսի գինը հասել է $613.92-ի՝ սահմանելով նոր ռեկորդային մակարդակ։
Ընկերության արժեթղթերը աճում են արդեն հինգ առևտրային օր անընդմեջ։ Այդ ժամանակահատվածում AMD-ի բաժնետոմսերը թանկացել են մոտ 24%-ով։ Վերջին վերելքը կարևոր շրջադարձ է ներդրողների համար, քանի որ նախորդ ամիս բաժնետոմսը նվազել էր՝ չնայած երկրորդ եռամսյակի սպասումներից բարձր արդյունքներին։
AMD-ը երկրորդ եռամսյակում գրանցել է $11.54 մլրդ հասույթ, ինչը 50%-ով ավելի է, քան մեկ տարի առաջվա $7.69 մլրդ-ը։ Աճի հիմնական շարժիչը արհեստական բանականության չիպերն էին։ Ընկերության Data Center ստորաբաժանման վաճառքները կազմել են $6.7 մլրդ՝ տարեկան արտահայտությամբ աճելով 107%-ով։
2026 թվականը AMD-ի համար մինչ այժմ շատ ուժեղ է ընթանում․ տարեսկզբից բաժնետոմսը թանկացել է ավելի քան 180%-ով։ Սակայն նույնիսկ այս աճից հետո ընկերությունը դեռ զգալիորեն զիջում է արհեստական բանականության չիպերի շուկայի առաջատար Nvidia-ին, որի շուկայական արժեքը մոտ $5.4 տրլն է։
Չիպարտադրողների բաժնետոմսերի վերելքը կապված է արհեստական բանականության ենթակառուցվածքների արագ ընդլայնման հետ, և շուկան առայժմ լուրջ դանդաղման նշաններ չի ցույց տալիս։ Դա տեղի է ունենում նույնիսկ այն պայմաններում, երբ աճում են տվյալների կենտրոնների նկատմամբ հանրային քննադատությունը և խոշոր լեզվական մոդելների անվտանգության վերաբերյալ մտահոգությունները։
AMD-ի գլխավոր տնօրեն Lisa Su-ն նախորդ ամիս եկամուտների քննարկման ժամանակ ասել էր, որ ընկերությունը սպասում է 2027 թվականին կրկնապատկել տվյալների կենտրոնների վաճառքները։ Անցած շաբաթ Nvidia-ի գլխավոր տնօրեն Jensen Huang-ն էլ նշել էր, որ ակնկալում է հաջորդ տարի կրկնապատկել իր ընկերության վաճառվող չիպերի քանակը, ինչը շուկային ևս մեկ ազդակ է տվել պահանջարկի բարձր մակարդակի մասին։
Աղբյուր՝ www.cnbc.com
